Kryebashkiaku i Tiranës, Erion Veliaj komentoi reagimin e kryeministrit Edi Rama në mbështetje të qëndrimit të tij pas aferës “5D” ku në pranga ranë disa drejtorë të Bashkisë së Tiranës të akuzuar nga SPAK për vjedhjen e miliona eurove.
Veliaj deklaroi se të gjithë ata që u eksituan nga teoritë e konspiracionit u zhgënjyen nga reagimi i kryeministrit që i doli në krah kryebashkiakut të Tiranës.
Kryebashkiaku i kryeqytetit kërkon t’i hedhë “hi syve” shqiptarëve duke deklaruar se u surprizua dhe e vlerësoi këtë mbështetje nga ana e kryeministrit.
”Të gjithë ata që u eksituan nga kjo teori konspiracioni u zhgënjyen nga reagimi i kryeministrit që dëshmoi se e mendojmë njësoj. Ne themi, ne jemi skuadër politike, trasnformuese që hap 1001 kantiere, por nëse një kantier ka një problem nuk jemi skuadër avokatie. Altin Dumani dhe skuadra e tij janë skuadër prokurorie, të tjerët janë gjykatësish, ju mediash, por ne nuk bëjmë detyrën tuaj, as ju tonën.
Dëshmuam që vizionin e 2013 e kemi akoma shumë të qartë, madje votat e 2013 I kemi edhe më mëdha dhe zellin e 2013 e kemi shumë më të madh sec duhet ta kishin ata që janë në opozitë. Dhe kur ti shikon atë aliazh karikaturash që të thotë ty ik ti që të vijmë ne se me vota nuk vijnë dot, me punë jo e jo, ti thua kjo parti dhe kjo skuadër me gjithë inperfeksionet, di të reflektojë, të adaptohet për gjëra që të tjerët s’i kanë. Di edhe të kërkojë ndjesë, por që i ka ndryshuar faqen Shqipërisë”, tha Veliaj për Abcnews.
Kujtojmë që ditën e sotme shoqëria civile së bashku me opozitë protestuan përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
Veliaj është i detyruar të japë “llogari” dhe të sqarojë banorët e Tiranës se si kishin avulluar 30 milionë euro të taksave të qytetarëve nga buxheti te xhepat e të drejtorëve të emëruar prej tij.
