Dy shtetas janë arrestuar nga Policia në Vlorë pasi akuzohen për grabitje dhe dhunë.
Në pranga kanë rënë shtetasit me iniciale S. D., 49 vjeç dhe D. L., 36 vjeç, pasi mbrëmjen e kaluar i kanë zënë rrugën një automjeti dhe kanë grabitur shoferin duke i marrë para e karta bankare.
Policia sqaron se ngjarja ka ndodhur në afërsi të vendit të quajtur “Tregu i Orizit”.
“Nga veprimet hetimore dyshohet se këta dy shtetas, në bashkëpunim me njëri-tjetrin, më datë 02.04.2024, rreth orës 23:00, në afërsi të vendit të quajtur “Tregu i Orizit”, i kanë zënë rrugën me automjet, shtetasit A. T., dhe më pas i kanë marrë me forcë atij, një shumë parash dhe disa karta bankare”, raportojnë uniformat blu.
Sakaq gjatë kontrollit të ushtruar në lokalin e 36-vjeçarit shërbimet e Policisë njoftojnë se kanë gjetur disa doza lënde të dyshuar narkotike cannabis, të cilat u sekuestruan në cilësinë e provës materiale, bashkë me sendet e vjedhura dhe automjetin që autorët e dyshuar kanë përdorur për të kryer krimin.