Një ngjarje e rëndë është regjistruar mbrëmjen e kësaj të enjte në Tiranë, ku një efektiv policia ka plagosur një person, i cili ndodhej në një automjet që po transportonte rreth 1 kg kokainë.
Blutë e Tiranës raportojnë se struktura e narkotikëve kanë qenë duke kryer veprime operacionale në vendin e quajtur rruga “Mihal Duri”, në kuadër të procedimit penal nr. 496 te vitit 2024, veprime të autorizuara nga organi i Prokurorisë së Tiranës.
Sipas autoriteteve, gjatë momentit që stuktura operacionale ka tentuar të ndalojë automjetin tip “Volkswagen Tiguan” me ngjyrë të bardhë me targë AB 780 MP, drejtuesi i automjetit nuk i është bindur urdhrave të policisë për të ndaluar dhe ka ecur mbrapsht duke rrezikuar jetën e punonjësve të policisë dhe duke përplasur me qëllim shmangien automjetin e sherbimit të policisë.
Gjatë tentativës për t’u larguar një nga punonjësit e policisë ka qëlluar me armë në drejtim të automjetit dhe për pasojë është plagosur shtetasi E. S. Ky i fundit është dërguar me urgjencë në spitalin e Traumës nga punonjesit e policisë dhe ndodhet nën kujdesin e mjekëve, jashtë rrezikut për jetën.
Autoritetet raporton se në automjet janë konstatuar dhe dy persona të tjerë të cilët janë shoqëruar në ambientet e Policisë së Tiranës
Në automjet është konstatuar dhe një pako me peshë rreth 1 kg brenda së cilës dyshohet të jetë lëndë narkotike kokainë.
Policia bën me dije se janë njoftuar strukturat e AMP-se të cilat do të kryejnë veprimet hetimore nën drejtimin e Prokurorisë së Juridiksionit të Përgjithshëm Tiranë për sqarimin e rrethanave të ngjarjes. AMP, pas kryerjes së veprimeve të para në vendngjarje dhe sqarimit të të gjitha rrethanave do të bëjë njoftim të plotë mbi këtë ngjarje.
