Kryeministri Edi Rama ka reaguar në lidhje me negociatat e PS-së me Partinë Demokratike të drejtuar nga Sali Berisha, për normalizimin e situatës në Kuvend.
Përmes një postimi në rrjetet sociale, kreu i qeverisë mohon që të ketë pazare me “non gratën”, siç e konsideron ai liderin demokrat, teksa pretendon se është respektuar Kushtetutën. Ata që po e konsiderojnë si pazar, Rama i konsideron si “idiotë të dobishëm”, teksa sipas tij, “pazari me Non Gratën” nuk ekziston dhe janë akuza dhe shpifje krejt të pabaza.
Rama shprehet se nëse deputetë të Kuvendit mbledhin firmat për të ngritur një komision hetimor dhe e bëjnë kërkesën brenda asaj kornize, mazhoranca nuk ka as të drejtë, as arsye e as mundësi që ta refuzojë.
Në lidhje me Komisionin e Posaçëm të Reformës Zgjedhore, Rama shprehet se kur të mbyllet afati (që i përfundon për pak ditë), do të mbyllet edhe komisioni dhe do t”i kalojë Kuvendit. Kryeministri shton më tej se nëse nuk arrihet dot ndonjë mirëkuptim për ndryshime të ligjit dhe s’ka numra në sallë për të votuar ndryshime, do të shkohet në zgjedhje me ligjin aktual.
Reagimi i plotë i Ramës
Të gjithë idiotët e dobishëm janë sulur socialeve e kanaleve për të thënë se paskërkemi gëlltitur ç’kemi thënë dhe po bashkëpunokemi me Non Gratën, pse jemi dakord që sipas kornizës së përcaktuar nga Gjykata Kushtetuese të miratojmë komisione hetimore brenda kësaj kornize!
Po ne këtë e kemi thënë e stërthënë dhjetëra herë, qysh se refuzuam të miratojmë kërkesa për të ngritur komisione hetimore jashtë asaj kornize! Dhe nëse deputetë të Kuvendit që mbledhin firmat për të ngritur një komision hetimor e bëjnë kërkesën brenda asaj kornize, ne s’kemi as të drejtë, as arsye e as mundësi që ta refuzojmë. E kurdoherë që kjo të ndodhë vota jonë është sigurisht pro!
Çfarë ka këtu për të vënë kujën përveç nevojës për të helmuar publikun me akuza dhe shpifje krejt të pabaza mbi medemek “pazarin me Non Gratën”, i cili thjesht nuk ekziston?
Edhe për Komisionin bipartizan të Reformës Zgjedhore e kemi thënë prej disa kohësh, nëse nuk pjell asgjë veç sherrit e shamatasë së tyre deri kur të mbyllet afati, do të mbyllet edhe komisioni e kjo punë do t’i mbetet Kuvendit, ku po nuk u arrit dot ndonjë mirëkuptim për ndryshime të ligjit dhe s’ka numra në sallë për të votuar ndryshime, do të shkojmë në zgjedhje me ligjin që kemi. As për këtë s’kemi ndryshuar ndonjë qëndrim a mendim.
Atëherë ku është ky pazar dhe ku hyn Non Grata në këtë mes?!
Ah, nëse ata që do të digjnin parlamentin kanë ndërruar mendje dhe duan të rikthehen në punë, ne as nuk i pengojmë dot, as nuk duam t’i pengojmë të reflektojnë, përkundrazi na vjen mirë që ta bëjnë. Kjo është e gjitha dhe ne jemi ata që ishim, aty ku ishim, me po ato qëndrime që kishim, jo sepse është gabim të ndryshosh qëndrim, po sepse në këtë nuk ka asgjë për të ndryshuar në qëndrimin tonë.
Çudi që s’e mësuan dot që Partia Socialiste është gjithnjë tre hapa përpara dhe në fund të gjitha xhirot bosh përfundojnë po në pikën ku nisin, tre hapa mbrapa nesh.
