Sekretariati i Etikes i është “bindur” kërkesës së Grupit Parlamentar të Partisë Socialiste duke marrë masa të ashpra ndaj 3 deputetëve të opozitës, për kaosin e shkaktuar në Kuvend.
Deputeti demokrat Flamur Noka e pëson më keq duke u përjashtuar 30 ditë nga punimet e Kuvendit, Bledjon Nallbati u pëjashtua me 20 ditë, ndërsa një dënim më të lehtë mori deputeti tjetër i Partisë Demokratike, Saimir Korreshi i cili u përjashtua vetëm 5 ditë.
Vendimi: “Sekretariati i Etikës pasi shqyrtoi kërkesën e Grupit Parlamentar të PS, vendosi përjashtimin e deputetit Flamur Noka me 30 ditë, përjashtimin me 20 ditë të deputetit Bledjon Nallbani dhe përjashtimin me 5 ditë të deputetit Saimir Korreshi”
Kujtojmë se në seancën e së hënës, opozita protestoi sërish, ndërsa Noka tentoi që t’i bllokonte deputetit socialist, Vullnet Sina fjalën, duke i vendosur zhurmuese te mikrofoni. Edhe dy deputetët e tjerë janë akuzuar nga socialistët për bllokim të punës në Kuvend.
Çfarë ndodhi ditën e hënë në Kuvend?
Pankartat me mesazhe kundër qeverisë e kryeministrit Edi Rama dhe zhurma e bilbilave ishin të pranishme edhe në seancën plenare të së hënës.
Mesazhet e shkruara në shqip e anglisht dhe zhurmat e lëshuara nga makineri elektronike u përdorën si një shprehje revolte nga deputetët e opozitës që kërkojnë rikthimin e “të drejtave kushtetuese të mohuara”, përfshirë komisionet hetimore parlamentare dhe ndryshimin e përbërjes së Komisionit të Reformës Zgjedhore.
Në rendin e ditës ishin “diskutime për çështje të evidentuara nga zgjedhësit”. Megjithatë, e vetmja deputete që arriti të mbajë një fjalim ishte Edona Bilali e PS. Kryeparlamentarja Lindita Nikolla ia dha fjalën më pas kreut të PR-së Fatmir Mediut i cili refuzoi të flasë dhe më tej deputetit socialist Vullnet Sinaj. Megjithatë, ky i fundit nuk arriti të mbajë një fjalim pasi në mikrofonin me të cilin u bë gati të fliste, nënkryetari i PD-së Flamur Noka afroi makinerinë që prodhon zhurmë duke pamundësuar ligjërimin e Sinajt.
Në këto kushte, kryeparlamentarja Linidta Nikolla njoftoi mbylljen e seancës plenare, që zgjati afro 7 minuta.
Në një moment, deputeti demokrat Flamur Noka pati përplasje fizike me një punonjës së gardës, i cili tentoi ta ndalonte për të shkuar pranë deputetit Sinaj.
Në një tjetër episod, Noka iu afrua ministres së marrëdhënieve me parlamentin Elisa Spiropali me një pankartë në anglisht ku shkruhej: “Gjyqet janë për drejtësi, jo për marrëveshje politike”.
Skena e se henes është e ngjashme me ato të para rëndom gjatë seancave të javëve të fundit në Kuvend, që pasi opozita vendosi të përshkallëzojë aksionin parlamentar, duke kërkuar rikthimin e atyre që i quan “të drejta kushtetuese të mohuara nga mazhoranca”.
Gjatë kësaj kohe, PS ka miratuar në forcën e kartonit projektligje të rëndësishme, si marrëveshja Rama-Meloni për refugjatët, apo projektligji që i hap rrugën ndërtimeve në Zonat e Mbrojtura. E majta në pushtet nuk ka preferuar të lëshojë terren ndaj kërkesave të opozitës, ndërsa seancat plenare janë shndërruar në mbledhje 10-minutëshe apo më të shkurtra, ku socialistët e drejtuar nga Rama arrijnë të miratojë çfarëdolloj nisme ligjore me forcën e kartonit dhe duke anashkaluar çdo diskutim e injoruar çfarëdolloj kritike.
