Ka përfunduar pas 5 orësh diskutime Asambleja Kombëtare e Partisë Socialiste, e mbajtur me dyer të mbyllura, e mbajtur këtë të diel në një lokal në periferi të Tiranës.
Mësohet se në fokusi të diskutimeve ka qenë riorganizimi i partisë dhe diskutimet për zgjedhjet parlamentare të 2025-ës. Në përfundim të mbledhjes, kryesocialisti Edi Rama i ka njoftuar të tijët se Asambleja e PS-së do të rimblidhet sërish më 16 mars, por këtë herë në qytetin e Durrësit.
Në mbledhjen e sotme kanë raportuar mbi performancën drejtuesit e qarqeve në Tiranë, Berat, Shkodër, Lezhë dhe Fier, ku janë evidentuar problematika dhe janë lënë detyrat.
Burime për mediat bëjnë me dije se Rama nuk i ka kursyer kritikat për Qarkun e Tiranës, më konkretisht për Kavajën dhe Rrogozhinën ku socialistët dhanë performancë jo të mirë në zgjedhjet e kaluara lokale, madje dhe duke e humbur Kavajën. Rama i ka kërkuar drejtuesit politik të qarkut Veliaj dhe deputetit Etjen Xhafa të përcaktojë emrat e anëtarëve të PS-së dhe drejtuesit socialistë që nuk kanë plotësuar objektivat në terren.
Gjithashtu, mësohet se Rama ka shprehur rezerva edhe për performancën dhe angazhimet e ish-ministrave të tij, ku sipas kreut të qeverisë, pasi kanë lënë karriget kanë zbehur angazhimin e tyre.
Si shembull ai ka marrë Olta Xhaçkën, duke i thënë se nuk ka qene ekzistente në rrjetet sociale pasi u largua nga posti i ministres.
“Që kur ka ikur nga qeveria, ka harrur të futet edhe në Facebook”, ka thënë Rama. Rezerva ka pasur dhe për një sërë figurash të tjera që do të mbeten për tu zbardhur në vijim.
Gjithsesi, në përfundim të mbledhjes, në një prononcim për mediat, Rama tha se është shumë i kënaqur.
“Kemi bërë mbledhje me diskutime të shumta me shumë anëtarë. Ka qenë një mbledhje pune dhe në një mbledhje pune ka ballafaqime me fakte dhe opinione të mbledhura në një proces shumë kapilar. Ka shqetësime që vijnë nga organizata të ndryshme.
Ka pasur qasje vetëkritike nga të gjithë se bashku duke filluar nga unë. Mos i besoni shumë mënyrës si rrjedhin gjërat se duhen verifikuar në burim. Jam këtu me sekretarin e përgjithshëm për të informuar se jemi shumë të kënaqur nga kjo mbledhje. Kemi miratuar planin e veprimit për periudhën 15 shkurt 15 mars kur fillojnë mbledhjet në të gjithë organizatën tonë politike.” – tha Rama.
