Ka dështuar për herën e tretë radhazi në pak javë, mbledhja fizike e komisionit për reformën zgjedhore.
Tensionet filluan para orarit zyrtar të nisjes së mbledhjes (12:30) mes deputetëve demokratë dhe punonjësve të gardës të vendosur në hyrje të sallës ku ishte planifikuar seanca. Mes palëve pati përplasje verbale dhe shtyrje, me punonjësit e gardës që tentuan të ndalojnë hyrjen në sallë të ligjvënësve të PD-së të përjashtuar nga punimet e Kuvendit me votat e mazhorancës në Sekretariatin e Etikës.
Megjithatë, disa deputetëve arritën të vendosen brenda sallës “Pjetër Arbnori”, ndërsa të tjerë qëndruan në hyrje të saj.
Në këto çaste tensione, për disa momente, garda pengoi dhe gazetarët të futeshin në sallë.
Me mbërritjen e bashkryetarit të komisionit nga radhët e PS-së, Damian Gjiknuri u zhvillua një përplasje verbale mes tij dhe deputetit demokrat Flamur Noka, me akuza e kundërakuza.
Gjiknuri u largua, ashtu si deputetët e tjerë socialistë, ndërsa ata të “grupit Basha” të përfaqësuar nga Enkelejd Alibeaj, nuk u paraqitën fare në ambientet e Kryesisë së kuvendit.
Gjiknuri fajësoi opozitën për dështimin e mbledhjes, ndërsa paralajmëroi se mund të zhvillohet online.
Nga kampi tjetër, deputeti demokrat Oerd Bylykbashi akuzoi kryeministrin Rama se “ka marrë vendimin të shkatërrojë reformën zgjedhore”. Ai shtoi se opozita kërkon të vendosë rregulla në mënyrë që të parandalohet manipulimi i votës në zgjedhje. Bylykbashi tha se Rama do të bëjë pazar dhe po kërkon numra në Kuvend për të bërë një reformë të njëanshme në kundërshtim me rekomandimet e ODHIR, me qëllim vjedhjen e zgjedhjeve të radhës.
Në mes të Janarit ishte data e caktuar për zhvillimin e mbledhjes së parë të komisionit për zgjedhoren, pas dy viteve. Mbledhje e cila dështoi, ndërsa palët nuk kanë gjetur ende konsensus edhe në dy seancat pasardhëse.
Opozita kërkon kërkojnë zëvendësimin e bashkëkryetarit Enkelejd Alibeajt me Oerd Bylykbashin dhe deputetëve të tjerë të “grupit Basha”, me argumentin se nuk përfaqësojnë PD-në. Alibeaj nga ana tjetër ka shprehur vendosmërinë për të mbajtur karrigen e bashkëkryetarit duke pretenduar se ai dhe deputetët e tjerë që e mbështetin “përfaqësojnë Partinë Demokratike”. Kërkesa e opozitës kundërshtohet dhe nga mazhoranca, që është shprehur e vendosur për realizimin e një reformë të njëanshme.
Veç dështimit të tre mbledhjeve fizike, komisioni është mbledhur një herë online, duke miratuar kalendarin e punimeve. Pjesë e kësaj mbledhjeve kanë qenë deputetët e mazhorancës dhe ata të “grupit Basha”. Gjasat janë që veprimtaria e komisionit të avancojë online me një bashkëpunim mes ligjvënësve të PS-së së drejtuar nga kryeministrit Edi Rama dhe grupit të deputetëve që mbështesin Lulzim Bashën.
