Zhvillimet e kësaj të premteje në komisionin e posaçëm për reformën zgjedhore kanë qenë një përsëritje e asaj që ndodhi një javë më parë.
Deputetët demokratë zunë karriget e atyre socialiste në shenjë proteste si dhe përdorën bilbila për të krijuar zhurmë si në seancën e fundit plenare. Mes palëve pati debat për disa çaste në sallën e mbledhjes. “Na jepni të drejtat tona. Na jepni përfaqësimin”, iu drejtua në një moment Albana Vokshi – Damian Gjiknurit, bashkryetarit të komisionit nga radhët e PS.
Në kushtet e pengimit të zhvillimit normal të mbledhjes, ligjvënësit socialistë u larguan nga mbledhja.
Në një prononcim për gazetarët, deputeti demokrat Ervin Salianji tha se pengmarrja e komisionit nga mazhoranca po vijon.
“E patë edhe sot një teatër tjetër. Nga shtatë deputetët që kanë marrë me dhunë bashkëkryesimin me votat e mazhorancës kishin konfirmuar pjesëmarrjen në mbledhje. Edhe sot u bojkotua mbledhja siç është bojkotuar prej dy vitesh me radhë. E patë teatrin dhe nënqeshjen e përfaqësuesve të mazhorancës. Kanë dy vite që nuk bëjnë asnjë gjë, nuk duan reformë zgjedhore, e thanë hapur në mbledhje që do të gjejnë forma të tjera se si ta bëjnë reformën, por jo reformim zgjedhor, por si të adresojnë problematikat që ka adresuar Gjykata Kushtetuese. Praktikisht thanë prapë që do përpiqen të gjejnë vota për t’i bërë zgjedhjet kushtetuese sepse nuk mund të ketë zgjedhje. Zgjedhjet janë antikushtetuese me këtë kod zgjedhor që është sot. Kjo është situata. Kjo është tallja që bëhet me qytetarët”, tha ai.
Deputeti tjetër demokrat, Oerd Bylykbashi tha se zhvillimet e sotme provuan edhe njëherë se PS nuk kërkon një reformë zgjedhore, pasi sipas tij, synimi i kryeministrit Edi Rama është blerja sërish e zgjedhjeve të ardhshme. Bylykbashi përsëriti kërkesën e opozitës për përfaqësim të drejtë dhe sipas ligjit në komision.
“PD dhe gjithë opozita, gjithë koalicioni opozitar ka shprehur vazhdimisht gatishmërinë për të gjetur konsensus për të trajtuar atë që kërkojnë partnerët me deklaratën e fundit fare qartë edhe nga OSBE/ODIHR. Kjo është kërkesa e re, e dorëzuar dje në parlament, ku 47 deputetë kanë firmosur sërish kërkesën që komisioni i Reformës Zgjedhore të rikompozohet në përputhje me vullnetin e shumicës dërrmuese të opozitës. Përsëri ne presim që mazhoranca të lërë lojën që bën me segmente të vogla. Shqipëria nuk ka nevojë për një politikë të njëanshme që mbështetet mbi paterica”, tha ai.
Një ditë më parë, 47 deputetë demokratë, përmes një kërkesë dërguar kryeparlamentares Lindta Nikolla, u shprehën dakord që grupi Basha të ketë një deputet në komisionin e posaçëm. Ata i qëndruan kërkesës që bashkëkryetari Enkelejd Alibeaj (përfaqësues i grupit Basha) të zëvendësohet nga Oerd Bylykbashi.
Ndërkohë, nga grupi Basha dhe mazhoranca, nuk duket të ketë shenja të pranimit të kërkesave të opozitës. Pas dështimit të mbledhjes fizike, mazhoranca dhe deputetët e “grupit Basha” u mblodhën online në mesditë. Në mbledhje, u miratua me shumicë votash kalendari i punimeve të komisionit të posaçëm.
