Gjykata Kushtetuese ka refuzuar të marrë në shqyrtim kërkesën e bërë nga partia e Lulzim Bashës, që kërkonte rrëzimin si antikushtetues të marrëveshjes Rama-Meloni për refugjatët.
Kolegji i Gjyqtarëve ka vendosur të mos e pranojë padinë e partisë së vulës, me argumentin se nuk legjitimohet si subjekt për t’iu drejtuar gjykatës pasi nuk provohet interesi i saj i drejtpërdrejtë në çështjen e ngritur.
“Mbledhja e Gjyqtarëve arriti në përfundimin se kërkuesja, Partia Demokratike e Shqipërisë, nuk legjitimohet ratione personae t’i drejtohet Gjykatës, pasi nuk provohet interesi i saj i drejtpërdrejtë në çështjen kushtetuese të ngritur, në kuptimin që protokolli të ketë sjellë pasoja negative për statusin ose funksionet e saj, ndaj vendosi moskalimin e çështjes për shqyrtim në seancë plenare, që do të thotë se kërkimet dhe pretendimet e kërkueses nuk mund të shqyrtohen në themelin e tyre”, thuhet në një njoftim të gjykatës.
Ndërkohë, Kushtetuesja vendosi më herët të pranojë shqyrtimin e kërkesën e PD-së së drejtuar nga Berisha, që kërkon gjithashtu shpalljen antikushtetuese të marrëveshjes. Të Mërkurën e 13 Dhjetorit, Kushtetuesja pranoi një kërkesë të ndërmjetme të PD për të revokuar votimin e marrëveshjes Rama-Meloni në Kuvend. Seanca në Gjykatën kushtetuese për shqyrtimin e ankimit të opozitës është caktuar në datën 18 janar 2024, ora 10:00.
Pavarësisht kësaj, pala italiane është shprehur optimiste se në vendimin final, Kushtetuesja do të miratojë marrëveshjen dypalëshe. Këtë të Premte, zv/kryeministri italian, i cili mban dhe detyrën e ministrit të Jashtëm, Antonio Tajani ka mbërritur në një vizitë zyrtare në Shqipëri. Ai ishte në portin e Shëngjinit, ku është parashikuar që të ngrihet qendra për pritjen e refugjatëve. Po ashtu, pritet të takohet edhe me kryeministrin Edi Rama dhe ministrin e Jashtëm, Igli Hasani. Në fokus të vizitës mendohet se është pikërisht çështja e marrëveshjes mes dy vendeve për emigrantët.
Marrëveshja Rama-Meloni, parashikon strehimin në Shqipëri të refugjatëve që kapen nga autoritetet detare italiane në Mesdhe. Edhe pse pakti ka marrë kritika të shumta, kryeministri Edi Rama është shprehur i vendosur për vënien e tij në jetë.
