Marrëveshja Rama-Meloni për refugjatët nuk do të votohet në seancës e së enjtes (14 Dhjetor) siç e parashikon rendi i ditës së Kuvendit. Vendimi që revokon votimin është marrë nga Gjykata Kushtetuese, që vendosi kalimin e çështjes për shqyrtim në seancë plenare. Seanca është caktuar në datën 18 janar 2024, ora 10:00.
Në një deklaratë për mediat, kryetarja e gjykatës Holta Zaçaj njoftoi se “shqyrtimi në seancë i çështjes pezullon automatikisht procedurat e ratifikimit në Kuvend të Protokollit të bashkëpunimit, deri në vendimin përfundimtar të Gjykatës Kushtetuese”.
“Grupi i deputetëve ka ngritur pretendime se nuk është respektuar procedura e negocimit dhe e nënshkrimit, pasi Protokolli i bashkëpunimit bën pjesë në ato kategori marrëveshjesh që kërkojnë autorizimin e Presidentit, pasi prek çështje të territorit dhe të të drejtave themelore, sipas nenit 121, pika 1, shkronjat ‘a’ dhe ‘b’, te Kushtetutës. Po ashtu, ata kanë paraqitur edhe tre kërkesa të njëjta për pezullimin e procedurave parlamentare për ratifikimin, mbi shkakun se shqyrtimi dhe votimi i Protokollit ishte planifikuar nga Kuvendi për seancën plenare të datës 14 dhjetor 2023”, tha Zaçaj.
Marrëveshja Rama-Meloni, që parashikon strehimin në Shqipëri të refugjatëve që kapen nga autoritetet detare italiane në Mesdhe, u ankimua në Kushtetuese nga Partia Demokratike më 6 dhjetor.
Në një prononcim për gazetarët, deputetja demokrate Lindita Metalia deklaroi se pret nga GJK cilësimin e marrëveshjes si të papajtueshme me Kushtetutën.
Po atë ditë, një ankim i ngjashëm u depozitua në GJK edhe nga “grupi Basha”.
Marrëveshja mes Ramës dhe Melonit ka marrë kritika të shumta, megjithatë kryeministri Edi Rama është shprehur i vendosur për miratimin në Kuvend.
