Kreu i PD, Sali Berisha ka deklaruar se nuk do të shkojë në mbledhjen e Këshillit të Mandateve që do të zhvillohet ditën e sotme për shqyrtimin e kërkesës së SPAK që kërkon heqjen e imunitetit të liderit demokrat.
“Sot pra, ata shkojnë si përfaqësues të Edi Ramës, mbi Kushtetutën, mbi parlamentin, poshtërojnë në këtë mënyrë institucionin qendror të një republike parlamentare, de facto sot një narkorepublikë apo republikë e bandës, krimit dhe vjedhjes së shqiptarëve. Edi Rama dhe larot e tij vrapuan drejt parlamentit për t’i kërkuar zevëndësimin e masave anti-kushtetuese që kanë dhënë ndaj meje me masat më të rënda, arrestin me burg ose arrest shtëpie. Ky është poshtërim i parlamentit. Ndaj dhe unë sot nuk mund të ndodhesha kurrë në atë komision. Të pranoja një poshtërim publik të tillë të institucionit që me Kushtetutë është institucioni qendror i Republikës Parlamentare”-tha Berisha.
Kryedemokrati ripërsëriti qëndrimin se kërkesa e SPAK ka qenë që në gjenezë antikushtetuese, për shkak se nuk iu drejtua parlamentit për miratimin e masës së sigurisë ndaj tij.
“Prokurorët shkojnë sot në parlament si larot e Edi Ramës”, u shpreh kryedemokrati.
Berisha paralajmëroi se “sot nis beteja pa kthim në rrugë”, duke iu referuar protestës së sotme të PD.
