Njësoj siç ka bërë me të gjithë, kryeministri Edi Rama vijon traditën për të vjedhur vëmendjen nga suksesi i Kombëtares shqiptare.
Sylvinho është “viktima” e radhës që bie preh e Edi Ramës i cili ka vijuar propagandën e tij duke i dorëzuar trajnerit të kombëtares çmimin ‘Shqiponja e Artë’ pasi sipas tij ai është një “Shqiptar që po lind”.
Në Ditën e Arbëreshëve dhe Samitin e Diasporës, Rama tha se Silvinjo është personi i parë që po nderohet me çmimin “Shqiponja e Artë” pa qenë një shqiptar dhe mes batutave i tha se ai nuk ka për të pasur zgjidhje tjetër veçse të pranoj nacionalitetin shqiptar.
Gjithashtu Rama paralajmëroi se Sylvinho shumë shpejt do të marrë pasaportën shqiptare por nuk dihet nëse tekniku brazilian plotëson kushtet për të marrë nënshtetësinë e vendin tonë, apo ligjet dhe kriteret anashkalohen me urdhër të Ramës.
Rama: “Kjo është një shqiponjë e destinuar për të gjithë shqiptarët specialë, jo specialë sepse të gjithë shqiptarët janë specialë, por për shqiptarët që janë më shumë specialë sesa specialët. Ti je i pari joshqiptar që po e merr Shqiponjën e Artë, por jo për çfarë ke bërë, por sepse je një shqiptar që po lind. Me shqiponjën e Artë të njoftoj se shumë shpejt do të kesh nënshtetësinë shqiptare.”
Më pas, Sylvinho shprehet: “Sigurisht, shqiptar puro. Ju falënderoj juve dhe të gjithë shqiptarëve. Marr këtë çmim dhe për mua është një nder i madh”.
