Një person është arrestuar këtë të mërkurë në Vlorë, dhe dy të tjerë janë shpallur në kërkim pasi akuzohen se kanë grabitur me dhunë një të ri.
Në pranga ka rënë shtetasi M.M, 19-vjeç ndërsa në kërkim janë shpallur A.K 19-vjeç dhe I.A 19-vjeç. Blutë bëjnë me dije se në bashkëpunim me njëri tjetrin këta shtetas i kanë marrë një shumë parash një 18-vjeçari, duke e dhunuar fizikisht.
“Si rezultat i veprimeve hetimore, u identifikuan 3 autorët e dyshuar të rastit, shtetasit M. M., 19 vjeç, banues në Vlorë, A. K., 19 vjeç dhe I. A., 19 vjeç, të dy banues në fshatin Kotë. Shërbimet e Policisë kanë arrestuar shtetasin M. M. dhe po punojnë për kapjen e 2 shtetasve të tjerë.
Nga veprimet hetimore dyshohet se këta tre shtetas, në bashkëpunim me njëri-tjetrin, i kanë marrë me dhunë një shumë parash një 18-vjeçari, duke e dhunuar fizikisht.
Vijojnë veprimet hetimore për zbardhjen dhe dokumentimin e vjedhjeve të tjera që mund të jenë kryer nga këta shtetas”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
