Deputeti Flamur Noka, është shprehur se mbyllja e derës nga garda, këtë të hënë te kryesia është antiligj dhe anti-kushtetutë.
Pasi kapërceu kangjellat e kryesisë, sepse Garda nuk e lejonte brenda, Noka iu drejtua medias me këto fjalë:
“Ajo që po shikoni këtu është antiligj, anti-Kushtetutë, vetëm për të qetësuar fobinë, panikun që ka Linda dhe regjimi dhe Edi Rama nga opozita. A patë ndonjë mekanizëm ligjor që të pengohet opozita?! Është mbyllur me hekur, me zinxhirë, me drynë. Linda e ka kthyer parlamentin në një bunker. Po mbrohet nga deputetët e opozitës që duan të shkojnë në zyrat e tyre dhe të ushtrojnë detyrën siç ua jep ligji dhe Kushtetuta.”
Noka u shpreh se Garda ka zbarkuar në Kryesi dhe se duket sikur po përballen me një bandë kriminale.
“Të shohim se çfarë dokumenti do të përpilojnë. Ndalojnë deputetët që të hyjnë në zyrat e tyre ku kanë mbledhje. Ne po përkojmë mbi çfarë urdhri nuk po lejohemi të shkojmë te ambientet e punës. Përveç se na ka shpallur armik Linda, nuk na lejojnë të futemi në zyra. Vetëm 100 gardistë janë të zyra e Lindës, sikur do e hamë. Është themeluar kështjella e Gardës që e mbron Lindën sikur ne jemi banda, trafiku dhe mafia dhe po mbrohet. Ku është parë kjo! Kjo është e turpshme, e neveritshme. E kuptoni se ku e kanë çuar këta demokracinë? Dhunë, terror, mbyllen në bunker. Ata mbyllen me hekura, a thua se ka ardhur mafia dhe krimi ndërkombëtar për të sulmuar Lindën!”, tha Noka.
