Ditën e sotme në orën 10.00 është parashikuar mbledhja e Konferencës se Kryetarëve, ku do te miratohet Projektbuxheti për vitin 2024.
Në këtë mbledhje ka kërkuar të marrë pjesë edhe kreu i grupit parlamentar të PD-së, Gazment Bardhi, i cili është përjashtuar me 10 ditë nga aktivitetet parlamentare. Për këtë fakt, kryeparlamentarja Lindita Nikolla nuk e ka lejuar që të marrë pjesë në mbledhje, me të cilën ka zhvilluar debate të forta.
“Për ça më ke përjashtuar? Ça kam bërë që jam përjashtuar…Si qenka kjo rregullore. Po ti ke dy muaj që merresh me mua…”, i është drejtuar Bardhi, Nikollës.
Në derën e zyrës ku do të zhvillohet mbledhj ndodhet dhe deputetë të tjerë të PD, mes të cilëve dhe lideri demokrat Sali Berisha, të cilët kanë paralajmëruar se nuk do ta lejojnë punimet në Konferencën e Kryetarëve nëse nuk lejohet Bardhi.
Nikolla është parë në shkallët e Kuvendit e shoqëruar gjatë gjithë kohës nga garda.
Ndërkohë, e kushtëzuar nga situata e krijuar, deputetët e mazhorancës, kanë kërkuar një sallë tjetër për të zhvilluar mbledhjen pa deputetët e opozitës.
Deputetët e opozitës kanë vendosur që veprimtaria parlamentare të bllokohet deri në momentin kur mazhoranca të plotësojë kërkesat e tyre siç janë komisionet hetimore si dhe ndryshimi i anëtarëve të Komisionit të Reformës Zgjedhore.
