Partia Socialiste kërkon përjashtimin e 7 deputetëve të Partisë Demokratike nga Komisioni i Procedurës dhe Etikës, duke i konsideruar si përgjegjës për kaosin e shkaktuar në seancën e djeshme plenare në Kuvend.
Më konkretisht, mazhoranca kërkon marrjen e masave disiplinore ndaj deputetëve: Gazment Bardhi, Flamur Noka, Edi Paloka, Bledion Nallbati, Albana Vokshi, Saimir Korreshi dhe Lefter Gështenja.
Siç duket, edhe pse me krahun e thyer, PS ndihet e rrezikuar edhe nga Korreshi teksa në dokument theksohet se ai bashkë me Lefter Gështenjën kanë bllokuar foltoren.
PS argumenton se kërkon marrjen e masave displinore ndaj kolegëve demokratët, pasi sipas saj, ata bllokuan foltoren e Kuvendit si dhe hoqën kartat nga pajisjet elektronike të deputetëve të grupit parlamentar të PS-së. Në dokument theksohet se situata arriti deri në përplasjen fizike mes deputetëve Vullnet Sinaj dhe Bledion Nallbati. Dokumenti është firmosur nga 13 deputetë socialistë.
