Dy punonjësit e Policisë kanë dalë nga selia e PD pa patur një takim me kryetarin e Partisë Demokratike Sali Berisha. Ata kanë qëndruar rreth 1 orë në selinë qendrore të PD-së me qëllim për ta njohur atë me vendimin e GJKKO që ka caktuar ndaj kryedemokratit masën detyrim paraqitje dhe ndalim për të lëvizur jashtë vendit.
Detaje lidhur me atë çfarë ndodhi i dha vetë Berisha dhe deputeti demokrat Oerd Bylykbashi.
Në një deklaratë në hyrje të selisë blu, deputeti demokrat Oerd Bylykbashi la të kuptohet se Berisha nuk e ka pranuar vendimin, pasi sipas tij është antikushtetues.
“Veprimi është në kundërshtim me kushtetutën çdo veprim në kundërshtim me kushtetutën s’mund të firmoset”, tha Bylykbashi në një deklaratë për gazetarët.
Ligjvënësi shpjegoi se për çdo masë sigurie për një deputet dhe jo vetëm “arrest me burg”, duhet që fillimisht të miratohet nga Kuvendi. Dhe në kushtet kur kjo nuk ka ndodhur, shtoi, atëherë vendimi i gjykatës është i paligjshëm.
Ai theksoi se veprimet e SPAK janë kryetarit të PD kanë sfond politik.
“Pas akteve qartazi me një sfond politik nga një instrument gjoja i drejtësisë së re, i ngritur dhe i akuzuar që në fillimet kur është ndërtuar se po ndërtohet për t’u kapur dhe përdorur politikisht, pas asaj, në shkelje flagrante të Kushtetutës, SPAK dërgon Policinë e Shtetit, e cila në fakt është organ i zbatimit të ligjit dhe jo i urdhrave politikë të Edi Ramës, dërgon Policinë e Shtetit duke kërkuar ekzekutimin e një mase që kufizon lirinë e një deputeti të republikës, zotit Sali Berisha, deputet i Parlamentit të Shqipërisë, kryetar i PD. Kufizon lirinë e tij në kundërshtim me Kushtetutën. Tashmë është praktikë e konsoliduar e parlamentit të Shqipërisë se prokuroria duhet të kërkojë leje nga Kuvendi, i cili duhet të japë autorizimin jo vetëm për arrestin, por dhe çdo lloj mase tjetër kufizimi të lirisë të çdo shtetasi shqiptar, që është deputet”, tha ai.
Deputeti u shpreh se urdhri kufizon lirinë e lëvizjes të parashikuar në nenet 37 dhe 38 të lëvizjes.
“Neni 73 i kushtetutës detyron që çdo formë e kufizimit të deputetit duhet të kërkohet autorizimi”, shtoi ai.
Vendimin e gjykatës të kërkuar nga SPAK e quajti sulm të hapur nga opozitës në momentin që është marrë vendimi për përshkallëzimin e aksionit opozitar.
Ai deklaroi se “jemi të vendosur të luftojmë fort kundër këtij agresioni politik”, ndërsa shtoi “s’do devijojmë nga vendimin që kemi marrë për vendosjen e demokracisë në këtë vend”.
Disa minuta pas Bylykbashit, nga selia e PD doli Berisha i cili konfirmoi për gazetarët se nuk i takoi fare punonjësit e policisë. Arsyeja, u shpreh ai, konsiston se vendimi i gjykatës është antikushtetues.
“Kushtetuta është Kushtetutë. Siç ua sqaroi Bylykbashi, ky ishte një akt i turpshëm i Edi Ramës i cili i urdhëron si mercenarë të shkelmojnë Kushtetutën. Ka një nen, neni 73 pika 2, që qartëson në mënyrë të kristaltë çdo veprim, pra deputetit nuk mund ti kufizohet liria në asnjë lloj forme pa vendim të parlamentit“, tha Berisha.
“Unë ata nuk i takova fare sepse unë nuk mund të pranoj shkelmim të kushtetutës se do Edi Rama, nuk mund të pranoj. Po ti takoja, do i thoja çojani Edi Ramës ta ziejë çaj. Mos i ngatërrojmë gjërat, ajo që nisi ditën e enjte është pa kthim. Edi Rama përpiqet ti mpleksë, por me dështim”, tha kryedemokrati për gazetarët.
Lidhur me procedimin penal të privatizimit të kompleksit Partizani, Berisha akuzohet nga prokuroria për korrupsion pasiv në bashkëpunim. Ndërsa dhëndri i tij Jamarbër Malltezi është arrestuar nga policia këtë të shtunë, që ka ekzekutuar një masë sigurie arrest me burg të dhënë nga Gjykata e Posaçme me kërkesë të SPAK. Prokurorja Enkeleda Millonai ka ngritur ndaj tij akuzat për korrupsion pasiv dhe pastrim parash, kryer në bashkëpunim. Po ashtu, masë sigurie detyrim paraqitje nga gjykata është dhënë dhe për ndërtuesin Fatmir Bektashi, firma e të cilit ka kryer ndërtimet te trualli i ish-kompleksit shtëror, ku tashmë ngrihet një kompleks banimi.
Në një deklaratë për mediat më herët gjatë ditës, Berisha i cilësoi masat e SPAK të urdhëruara nga Rama, ndërsa shtoi se destinacioni i klubit Partizani, nga terren sportiv në truall për ndërtime, është ndryshuar me firmën e Edi Ramës dhe pa propozimin e Sali Berishës.
