Gazment Bardhi, në një dalje për mediat pas mbledhjes që zhvilloi me Sali Berisha, komentoi vendimin e Lulzim Bashës për shkarkimin e tij nga PD.
Bardhi theksoi se ky është një vendim i Edi Ramës dhe nuk ka asnjë lidhje me rregulloren e Kuvendit. Më tej ai shtoi se Rama ka dhënë urdhër që të përjashtohen deputetët e opozitës.
“Është një vendim politik që nuk ka asnjë lidhje me rregulloren e Kuvendit dhe nuk mund të bëjmë sikur jemi në një situatë normale brenda parlamentit. Ka një urdhër të Edi Ramës për të përjashtuar deputetët e opozitës dhe kolegët e PS kanë batuar atë urdhër. Eshtë vendim politik i Edi Ramës”-tha ai.
I pyetur nga gazetarët, Bardhi garantoi se opozita do të unifikohet, ndërsa e cilësoi Kryesinë e PD-së, me në krye Lulzim Bashës një aleancë me një anëtarësi prej 15 vetash e vetëshpallur si e tillë që nuk merr vendime të tjera përveç përjashtimeve të deputetëve. Bardhi u shpreh se akti më i rëndë i Bashës është se qëndron të krye të një partie që shumica nuk e do.
“Nuk ka përjashtim më të rëndë për një anëtar të PD-së, për një ish kandidat për kryeministër, sesa të shpallë non grata shumica e deputetëve.
Me shifrat e zotit Basha, besoj u habitët sesi me një të rënë të lapsit hoqën 50 mijë anëtarë të partisë sepse nuk deshën Bashën. Pastaj aktet e 15 vetave që janë vetëshpallur kryetarë kryesie merrini me të qeshur.
Unë nuk vendos asnjë kusht që secili faktor opozitar të bëhet bashkë kundër keqqeverisjes së Edi Ramës. Unë interes kam PD dhe demokratët. Qëndrimi ynë i qartë, të zbatohet rregullorja e parlamentit. Çdo devijim do të ketë pasoja, ata që e nxisin të mbajë përgjegjësi.
Qëndrimi im për protestat është i njohur, i bashkohem çdo proteste kundër Edi Ramën.
Ata (Kryesia) mblidhen vetëm për të përjashtuar, keni dëgjuar të mblidhen ndonjëherë për punë? Jo, mblidhen vetëm për të përjashtuar. Opozita do jetë e unifikuar, çdo përpjekje për ta mbajtur opozitën e përçarë do marrë përgjigjen e merituar.”– tha Bardhi.
