Kryetari i Partisë Demokratike, Sali Berisha paralajmëroi se opozita do të nisë përgatitjet për protesta “të fuqishme dhe të qëndrueshme” kundër qeverisë. Qëllimi, tha ai, është që të sigurohet vota e lirë.
Në një deklaratë për gazetarë në dalje të Kuvendit, ai listoi disa nga gjetjet e raportit përfundimtar të OSBE/ODHIR për zgjedhjet e 14 Majit “Raporti konstaton kontrollin e votës. Cilido që lexon këtë raport, gjen se 14 maji ishte një farsë e vërtetë elektorale“, u shpreh.
Protestat
Më tej, Berisha theksoi: “Të përgatitemi në protesta të fuqishme dhe të qëndrueshme për të larguar këtë pushtet që qëndron i bazuar në raportin krimi shndërrohet në vota, vota shndërrohet në krim”.
“Kurrë mos përligjni një votë të vjedhur, vota e vjedhur apo nën presion, apo e kontrolluar nuk shpreh vullnetin tuaj, por vullnetin e atyre që ju rrëmbejnë të drejtën e votës”, ishte apeli i kryedemokratit për qytetarët.
Ai shtoi se PD qëndron “fuqishëm, e vendosur të udhëheqë shqiptarët drejt një përpjekje të madhe për të votuar të lirë si qytetarët e rajonit dhe Europës”.
Sipas kryedemokratit, raporti i ODIHR nuk provoi humbjen e opozitës, por vjedhjen e votës.
“Në një votë të kontrolluar, siç thotë qartësisht raporti i OSBE/ODIHR, në një votë të blerë, siç thotë qartësisht blerje masive, në një votë në terror, siç fakton raporti, nuk ka asgjë që mund të provojë humbjen e opozitës. Të gjitha këto provojnë vjedhjen e votës. Për ata që mendojnë se Edi Rama vodhi zgjedhjet dhe i fitoi ato, ato nuk bëjnë gjë tjetër përveçse përligjin vjedhjen dhe kjo është katastrofë. Unë u drejtohem atyre që janë të interesuar për votën e lirë. Ata janë të paktën 600 mijë që nuk u ndikuan nga asnjë masë dhe votuan në misionin e tyre të ri. Të ngrihemi kundër këtij regjimi dhe ne do përgatitemi për një lëvizje të qëndrueshme me qëllimin më madhor, që shqiptarët të votojnë të lirë si popujt e tjerë të rajonit”, deklaroi.
Ai u shpreh më tej se po bëhet një punë e madhe për bashkimin e opozitës. Kreu i PD tha se Partia Demokratike do lëvizë në shumë plane, por shtoi se “drejtim kryesor i saj duhet të jetë përmbysja e këtij regjimi i cili qëndron mbi binomin krimi-votë, vota-krim”.
Deklaratat në Kuvend
Ndërkohë, gjatë fjalës në seancën plenare të kësaj pasditeje, Berisha tha se foli në lidhje me situatën në Kosovë dhe reagimet e Edi Ramës. Berisha përmendi krahasimin që i bëri gazetari gjerman, Majkëll Martin, Edi Ramës, me kryeministrin serb Nikolla Pashiç.
“A ka albanofob me të madh në historinë shqiptare se Edi Rama. Edi Rama u vërsul me tërbimin më të madh kundër udhëheqjes politike të Kosovës. Shpalli skenarë imagjinarë, Donbas, republika KFOR-i dhe çdo gjë tjetër që e urdhëronte padroni i tij në Beograd, Aleksandër Vuçiç”, tha kryetari i PD-së në Kuvend.
Lexo edhe: Berisha: Në shqiptarët nuk ngrihen, Rama do jetë në pushtet deri në 2045
