Një automjet i djegur është gjetur këtë të enjte në fshatin Gjadër të njësisë administrative Dajç, brenda së cilit ishte një armë zjarri automatik.
Kjo armë sipas policisë, dyshohet të jetë përdorur në atentatin e djeshëm në Balldre të Lezhës, ku u ekzekutua Nikolin Leksatakaj.
Mjeti i djegur ndërkohë, është denoncuar i vjedhur në Dimal.
“Në vijim të kontrolleve të kryera nga shërbimet policore në të gjithë territorin e rrethit të Lezhës me qëllim gjetjen dhe kapjen e autorëve, në fshatin Gjadër të njësisë administrative Dajç, në një parcelë arë, nga shërbimet e policisë, është gjetur i djegur plotësisht një automjet tip Benz, i cili në shtator të vitit 2022, është denoncuar i vjedhur në Dimal të rrethit Berat. Nga këqyrja e automjetit, në brendësi të tij, janë gjetur një armë zjarri automatik dhe disa gëzhoja, të gjitha të djegura plotësisht. Arma e zjarrit e gjetur dyshohet të jetë arma që është përdorur për vrasjen e shtetasit N.M.(L). U bë sekuestrimi i tyre në cilësinë e provës materiale për tu dërguar për ekspertime”, thuhet në një njoftim të policisë së Lezhës.
Nikolin (Marku) Leksakaj, 42 vjeç, u qëllua me breshëri pas daljes nga një market nga një automjet në lëvizje që vinte nga rreth-rrotullimi i Lezhës me drejtim Shkodrën.
Dyshimet e grupit hetimor janë se krimi ishte i mirëorganizuar dhe ka vjen si hakmarrje për vrasjen e biznesmenit Ardian Nikulaj tre muaj më parë. Mes dy fiseve Nikulaj dhe Leksakaj ka një histori të vjetër hasmërie që daton prej vitit 1996.
