Shqipëria u trondit në dy ditët e fundit nga pamjet e dhunës brutale të familjarëve të deputetit Rrahman Rraja (përfshirë vëllezërit dhe djalin e tij) ndaj dy kushërinjëve Maja, vetëm për shkak se këta të fundit kishin denoncuar dëmet që u shkaktonte gurorja e Rrajave.
Por, duket se dhuna e ushtruar në grup ndaj një apo dy personave të vetëm është një fenomen që ndodh në gjithë Shqipërinë. Së fundmi, JOQ ka publikuar një video ku shihen një grup të rinjsh të cilët dhunojnë një qytetar.
Ata e kanë shtrirë qytetarin në tokë dhe e godasin pa pushim me shqelma dhe grushte. Por, të mos mjaftonte kaq, në pamje shihen edhe policë me uniformë, që asistojnë në dhunimin e qytetarit.
Ata ndodhen në vendin e ngjarjes dhe jo vetëm që nuk ndalojnë dhunën, por “u japin një dorë” dhe dhunuesve, pasi një prej efektivëve shihet duke shkelmuar qytetarin që është i shtrirë në tokë. Ngjarja thuhet se është regjistruar në Tiranë, por nuk dihen arsyet e sherrit.
