Kryeministri Edi Rama pretendon se është angazhuar në lirimin e efektivëve të policisë së ndaluar nga forcat serbe.
“Mesa duket KFOR-i nuk do të dalë me konkluzione publike për vendndodhjen e tre policëve të Kosovës. Pavarësisht pretendimeve të ndryshme për vendndodhjen, ata duhet të kthehen sa më parë në shtëpi! Qysh dje ne jemi 100% të fokusuar tek lirimi i tyre”, shkruan Rama në një postim në Twitter.
“Nuk ka asnjë paralele mes tre policëve dhe personit me precedentë kriminalë të arrestuar nga policia e Kosovës në Veri! De-eskalimi mbetet prioriteti i prioriteteve dhe pikat e vendosura nga bashkësia euro-atlantike duhen përmbushur një orë e më parë”, shton kryeministri, i cili anuloi në mënyrë të njëanshme dhe të paprecedentë një mbledhje të përbashkët me qeverinë e Kosovës.
Arrestimi i efektivëve të policisë së Kosovës nga ata serbë ditën e djeshme kanë shtuar më tej tensionet mes palëve. Pala serbe thotë se efektivët e Kosovës janë arrestuar në territorin serb, ndërsa Prishtina zyrtare ka deklaruar se ata u rrëmbyen në tokën e Kosovës dhe po mbahen peng nga Serbia. Në një deklaratë për mediat këtë të Enjte, kryeministri i Kosovës Albin Kurti kërkoi lirimin e policëve dhe tha se është e çuditshme që KFOR nuk ka reaguar për rastin.
