Nga Boldnews.al
Nuk përbën më asnjë “sekret” që pjesa kryesore e fondeve në tenderat publikë shkon tek një grup biznesmenësh, të cilët gjenden shumë pranë qeverisë së Edi Ramës apo që përfshihen drejtëpërdrejtë në fushatë në favor të Partisë Socialiste.
Një ndër raste më tipike, me akuza konkrete, është kompania “Salillari”, për të cilën tashmë janë depozituar disa kallëzime penale në Strukturën e Posaçme Anti-Korrupsion, nën akuzat se është përfshirë në blerje votash me paratë e fituara nga tenderat publikë.
Por, përtej kompanive grosiste “alla-Salillari”, ka edhe të tjera, të cilat në mënyrë “urtë e butë” shpallen fitues në tendera miliona euro. Janë kompani të lidhura ngushtësisht me familjarëve të zyrtarëve lokalë të Rilindjes apo me “opozitarë”, të cilët ngjasojnë më shumë me “ushtarë politikë” të Edi Ramës.
Ndër to spikasin “Start & Co”, në pronësi të familjarëve të prefektit të Tiranës, Afrim Qendro; “Euro-Gjici” në pronësi të vëllait të kryebashkiakut socialist të Kukësit, Safet Gjici; dhe “Shkëlqimi 07”, në pronësi të vëllait të kandidatit të grupit Basha-Alibeaj për zgjedhjet lokale të 14 Majit 2023, Agron Kapllanaj.
Prefekti me tendera miliardash
Në javën e parë të qershorit 2023, Universiteti “Aleksandër Moisiu” në Durrës shpalli fituesit e tenderit për ndërtimin e godinës së re, me fond limit rreth 8.2 milionë euro.
Fitues u shpall një bashkim operatorësh, i përbërë nga tre kompani private. Në krye të konsorciumit qëndron shoqëria ‘Start & Co”.
Në garë merrnin pjesë edhe tre konkurentë të tjerë. Por ata u skualifikuan të gjithë paraprakisht, për shkak të mos-plotësimit të kritereve, sipas asaj që thuhet zyrtarisht
Kompania zotërohet në 50 përqind nga Anila Qendro, bashkëshortja e prefektit të Tiranës, Afrim Qendro.
Gjici, miliarda me “marrëveshje të ndaluar”
“Boldnews.al” ka raportuar më herët se shoqëria “Euro Gjici” drejtoi një grup operatorësh ekonomikë, të cilët u shpallën fitues për një tender me vlerë rreth 10 milionë euro të Ujësjellësit të Tiranës, për vendosjen e kamerave në depot e ujit.
Kompania është krijuar nga kryebashkiaku i Kukësit, Safet Gjici. Ai ia dhuroni të gjithë aksionet vëllait të tij, Lavdrim Gjici, në vitin 2014, kur u emërua fillimisht si prefekt i Kukësit.
Tenderi për kamerat e ujësjellësit të Tiranës, i zhvilluar në Tetor të vitit 2020 është shoqëruar me pikëpyetje thelbësore për njëanshmëri dhe shkelje procedurash.
Këto dyshime morën një konfirmim zyrtar në një raport të Kontrollit të Lartë të Shtetit, të përfunduar në Prill 2023.
Audituesit shtetërorë arritën në konkluzionin se “vërtetohet katërcipërisht që kompaninë pjesëmarrëse në bashkim operatorësh janë në kushtet e marrëveshjes së ndaluar”.
Kjo do të thotë që shoqëritë janë vendosur në një raport jo-ligjor, me qëllim për të fituar tenderin, në shkelje të ligjit “Për Konkurencën”.
KLSH konstatoi se jo vetëm sjellja e kompanive, por edhe qëndrimi i autoritetit kontraktor, është tërësisht i dyshimtë.
Sipas kontrollorëve shtetërore, ndërmarrja e Ujësjellës-Kanalizimeve të Tiranës kishte detyrimin ligjor që të raportonte rastin pranë Autoritetit të Konkurencës. Por, askush nuk lëvizi dhe tenderi 10 mln euro shkoi tek Gjici dhe kompanitë e tjera të “marrëveshjes së ndaluar”, siç e përcaktoi KLSH.
Kapllanaj, opozitari me miliardat e Ramës
Në fund të majit 2023, shoqëria “Shkëlqimi 07” drejtoi një grup kompanish, të cilat u shpallën fituese e një tenderi me fond 1.6 miliardë lekë të vjetra, të zhvilluar nga Autoriteti Rrugor Shqiptar, për “ndërtimin e nyjes Bërzhitë dhe rrugët lidhëse të autostradës Tiranë – Elbasan me komunën Bërzhitë dhe zonat përreth”.
Kompania kryesore fituese është në pronësi të Shkëlqim Kapllanaj, vëllait të Agron Kapllanaj. Ky i fundit ka qenë më herët kryetar i komunës Mallakastër dhe në zgjedhjet lokale të 14 majit 2023 konkuroi për postin e kryebashkiakut të të njëjtës zonë, në siglën e grupit opozitar “Basha-Alibeaj”.
Opozita e drejtuar nga Sali Berisha ka deklaruar shpesh se Agron Kapllanaj është në shërbim të Edi Ramës, duke përfituar tendera publikë nga institucionet e drejtuar prej Rilindjes.
Kompania “Shkëlqimi 07” ka fituar kontrata publike për Rindërtimin tek zona e “5 Majit” në Tiranë, si edhe tendera në shumë njësi vendore të drejtuar nga socialistët, përfshirë Vlorën, Beratin, Orikumin e të tjerë.
