Të gjithë ata punonjës të cilët nuk zotërojnë një diplomë që përputhet me vendin e punës, apo që janë punësuar me dokumente false, do të marrin çantat e do të ikin në shtëpitë e tyre. Ky vendim është bërë me dije gjatë paradites së sotme nga kryeministri Rama.
Ai ka thënë shkurt dhe qartë para gazetarëve se në 6-mujorin e parë të vitit 2018, do të “pastrohet” administrata shtetërore nga ata punonjës që nuk janë të duhurit për funksionin që ushtrojnë. Në këtë “sitë” do të kalojnë të gjithë punonjësit e administratës shtetërore, duke shtuar se “nuk bëhet fjalë për administratën publike”.
“Vettingu në polici do të nisë në janar, pasi gjatë 100 ditëve të para është përgatitur gjithë baza për zbatimin e tij. Ndërkohë kemi përgatitur bazën për të bërë një Vetting në administratën shtetërore, nuk flas për administratën publike, për shërbimin civil, që në një farë mënyrë është një sistem i garantuar, dhe që baza shumë të favorshme për t’u forcuar në vijimësi, por flas për pjesën tjetër të administratës.
Do të largohen ato punonjës kur diploma nuk përputhet me vendin e punës, apo për ato rekrutime që janë bërë me letra false. Janë shumë të tilla për fat të keq. Dhe në 6 muajt e parë të vitit të ardhshëm, do të bëjmë një pastrim në këtë aspekt”, përfundoi Rama.
