Ministria e Jashtme ka propozuar emrat për kandidatë për ambasadorë të Shqipërisë në disa vende. Komisioni i Jashtëm do të nisë të premten dëgjesat me kandidaturat e propozuara për ambasadorë të Shqipërisë në disa vende të Evropës dhe Shtetet e Bashkuara të Amerikës.
Pasi kanë marrë dritën jeshile nga kryeministri, 12 propozimet e qeverisë shqiptare do të shpalosin platformën e tyre përpara deputetëve të Komisionit të Jashtëm.
Vendin e lënë bosh të ambasadorit në Emiratet e Bashkuara nga Ermal Dredha i cili kandidoi dhe fitoi si kryebashkiak i Vlorës, propozohet për tu zëvendësuar nga Ridi Kurtezi aktualisht ambasador në Malin e Zi.
Ish-nënkryetarja e kuvendit Vasilika Hysi është propozuar për Ambasadore e Jashtëzakonshme dhe Fuqiplotë e Shqipërisë në Misionin e Përhershëm të Shqipërisë pranë Zyrës së Kombeve të Bashkuara në Gjenevë.
Ndërsa diplomacinë shqiptare në kryeqytetin e Austrisë, Vjenë pritet ta drejtojë ish-deputeti socialist Fatmir Velaj.
Pasi të përfundojnë të gjitha dëgjesat, propozimet do të shkojnë për dekretim tek presidenti Bajram Begaj.
Lista me emrat e propozuar:
Ridi Kurtezi, Emiratet e Bashkuara Arabe
Zhaklina Peto, Mal i Zi
Aida Sakiqi, Gjermani
Ervin Bushati, SHBA
Ilir Gjoni, NATO
Vasilika Hysi, Misioni i OKB
Meri Kumbe, Izrael
Fate Velaj, Austri
Blerta Kadzadej, Turqi
Majlinda Frangaj, Vatikan
Mustafa Nano, Zvicër
Uran Ferizi, Mbretëri e Bashkuar
