Pasditen e djeshme në Kukës, pasi la tallavanë dhe e detyroi të kërcente vallen e Tropojës bashkë me Safet Gjicin përkrah Rexh Byberit, Edi Rama iu përvesh drejtuesit politik të qarkut Pandeli Majko, si për të treguar “revoltë” ndaj deputetëve që kërkojnë rritje pagash.
Indirekt, shefi i qeverisë pranoi se rritja e pagave të administratës dhe punonjësve të sektorit publik, të cilën e njoftoi 40 ditë para zgjedhjeve, e që supozohej të niste nga 1 Maji, nuk është aplikuar, por gishtin e drejtoi nga deputetët, duke i bërë përgjegjës për ngërçin e krijuar.
Pandi u bë “kokë turku” për diskursin politik të Ramës, i cili kërkoi të impononte në publik 10 ditë para zgjedhjeve idenë se faji për bllokimin e projektligjit për rritjen e pagave, i “ngec” ligjvënësve i qoftë këta edhe të selisë rozë, dhe jo atij.
Duke shmangur përgjegjësitë, Rama tha se ai kërkon që anëtarët e qeverisë dhe deputetët të jenë të fundit në listën e të punësuarve që do t’u rritet paga, por se Majko dhe kolegët e tij duan tani, e për këtë arsye ligji mbetet pezull.
“Kanë dalë tani dhe thonë, “e shtyu Edi Rama rritjen e pagave”. Nuk kam shtyrë unë fare. E para njëherë, ne pagat e mjekëve të mësuesve dhe punonjësve të sigurisë janë rritur dhe rritjen për prillin ata e marrin tani në fillim të majit, siç ndahen.
E dyta, unë kam pasur një debat sepse për rritjen e të gjitha pagave të tjera duhet të bëhet ligji në parlament. Ligji tashmë është në parlament dhe unë kam pasur një debat, që qeverisë dhe deputetëve duhet t’iu rriten pagat të fundit fare. Dmth, vitin tjetër kur të mbarojë rritja për të gjithë, edhe deputetëve dhe qeverisë do t’i rriten pagat. Deputetët duan t’i rrisin tani, dhe u bllokua për disa javë kjo punë sepse donin të më bindnin mua.
Nuk e di çfarë do të ndodhë, por kjo është arsyeja. Ama, të gjithë duhet ta dinë se edhe nëse rritja e pagave bëhet në maj, edhe nëse bëhet në qershor, të gjithë pagat do t’i marrin me të gjithë prillin dhe të gjithë majin”– tha Rama.
- Rritja e pagave për “efekt” elektoral
Kryeministri Edi Rama vazhdon me propagandën e tij elektorale duke premtuars rritje pagash në mënyrë që Partia Socialiste të “fitojë” disa vota për zgjedhjet lokale të 14 majit.
Reforma e pagave dhe rritja e tyre ishte sërish në fokus të mbledhjes së fundit të qeverisë, ku ishte vetë Edi Rama ai që prezantoi diskutimet dhe vendimet e arritura në funksion të saj.
Megjithëse vendi ynë prej më shumë se 10 vitesh po përballet me shpopullimin alarmant, qeveria e Edi Ramës nuk ka marrë asnjë politikë sociale për të ndaluar këtë fenomen që pritet të ketë pasoja akoma edhe më të rënda për vendin tonë. Ndërsa tashmë kur jemi rreth 1 muaj nga zgjedhjet lokale, Rama nuk e ndal imagjinatën e premtimeve madje këtë herë kreu i qeverisë thotë se është dakordësuar që me “shkopin magjik” paga mesatare në Shqipëri të shkojë brenda vitit nga 563 euro në 900 euro.
