Një 38-vjeçar në Tiranë ka rënë në prangat e Policisë, pasi akuzohet se është autori i të paktën dy grabitjeve.
Blutë bëjnë me dije se në pranga ka rënë Eduart Bardho, i cili është filmuar nga kamerat e sigurisë duke grabitur një automjet tip “Mercedes Benz” dhe një motor, duke përdorur një karrotrec.
Mësohet se Bardho pikaste kryesisht automjetet “Mercedes Benz ML” dhe motoçikletat. Pasi i vinte syrin një automjeti ai ndiqte itinerarin që përshkonte drejtuesi për të parë se ku do parkonin dhe më pas organizonte kohën dhe mjetet e nevojshme për të kryer vjedhjet.
Më pas grabitësi u ndërronte targat dhe i shiste mjetet për pjesë në tregun e zi.
Bëhet me dije se së fundmi ai kishte organizuar edhe vjedhjen e motorit të tij të punës, duke e shitur te një person tjetër.
“Shërbimet e Komisariatit të Policisë Nr. 1, në vijim të punës për goditjen e veprimtarisë kriminale në fushën e vjedhjes së pronës dhe pasurisë, kanë organizuar dhe finalizuar operacionin policor të koduar “Karrotreci”. Si rezultat i këtij operacioni u arrestua në flagrancë shtetasi E. B., 38 vjeç, banues në Tiranë. Gjithashtu, nisi procedimi në gjendje të lirë për shtetasin F. S., 36 vjeç, banues në Tiranë.
Shtetasi E. B. dyshohet se është autor i dy vjedhjeve të ndodhura gjatë javës së fundit, konkretisht më datë 27.04.2023, në rrugën “Hoxha Tahsim”, dyshohet se ka vjedhur me një karrotrec, automjetin e shtetases T. N., ndërsa më datë 03.05.2023, në rrugën “28 Nëntori”, dyshohet se ka vjedhur motomjetin e shtetasit A. H., të cilin më pas ia ka shitur shtetasit F. S. Në cilësinë e provës materiale u sekuestruan automjeti i vjedhur dhe motomjeti i vjedhur, si dhe një aparat celular”,– njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
