Kryetari i Partisë Demokratike, Sali Berisha u ndal këtë të Premte te inceneratori i Tiranës dhe lidhjet e kryebashkiakut të kryeqytetit Erion Veliaj me Iranian.
Nga Këlcyra, ku prezantoi kandidatin e koalicionit “Bashkë ftojmë” për këtë bashki, Berisha dënoi padinë e Veliajt kundër gazetarit që intervistoi biznesmenin italian Gabriele Tarroni. Ky i fundit është ish-ortak dhe ish-personi i afërt i Alberto Presezzi, biznesmen dhe aksioner në inceneratorin e Tiranës. Ai ka deklaruar se organizata terroriste iraniane si Hezbollah dhe Pasdaran kanë lidhje me Erion Veliaj e inceneratorin e Tiranës dhe pastrojnë para në Shqipëri.
Italiani thotë se provat për akuzat e tij gjenden në një kompjuter që iu sekuestrua pas arrestimit në Shqipëri dhe që nuk iu kthye asnjëherë.
Gjithashtu, ka treguar se si kompania e Presezzit i shiti qeverisë shqiptare inceneratorin skarco të Tiranës, që më parë ishte refuzuar dhe në shtetin afrikan të Zimbaveve.
Lidhur me Veliaj, të cilin thotë se e ka takuar më shumë se njëherë, tregon se kishte një rol të rëndësishëm në transaksion.
“Ishte Erjon Veliaj, kryetari i Tiranës, dhe kishte marrë pjesë në blerjen e këtij inceneratori mbeturinë, që nuk dinim kujt t’ia jepnim, dhe të gjithë në kompani ishin të kënaqur, që erdhën këta të gjithë së bashku, ia hodhëm dhe iu shitëm diçka që ishte e pashitshme. Nëse një vidë kushton një cent, dhe unë e shes gjashtë euro, askush në botë nuk mund ta konstestojë. Pse? Nëse unë të gjej ty që je gjysëmbudalla dhe të shes një gjë që kushton një cent dhe ta shes dhjetë, në një shtet si Shqipëria ku gjithçka është e mundur, sepse jetoni në një vend me korrupsion absolut. Në çdo vend të botës, Itali, Zvicër, etj, madje edhe në Zimbabve do të ishte i pamundur. Por në Shqipëri mund të bëhet”, është shprehur Gabriele Tarroni Longinotti.
Berisha: Indicje nga shërbimet e huaja për lidhjet e Veliajt me Iranin
Këtë të Premte, kreu i PD-së Sali Berisha u shpreh se lidhjet e Veliajt me Iranin i ka denoncuar dhe ai më herët. Madje, zbuloi se ka pasur indicje nga shërbime të huaja kur ishte kryeministër, për vizita të shpeshta dhe enigmatike të Veliajt në Iran.
“Aty urdhërohet me urgjencë të dënohet gazetari. Po pse? Sepse nxori lidhjet iraniane të Erion Veliajt. Po ato i kam denoncuar unë me dhjetëra herë. Nuk i kam denoncuar tani unë ato. Unë kam qenë kryeministër. Shërbimet e huaja më kanë thënë se ky njeri viziton në mënyrë enigmatike, të shpeshtë Tehranin. Dhe unë jam përpjekur sa kam mundur, të zbuloj çfarë janë këto udhëtime në Tehran të tij. Dhe tani dalin djegësat dhe paratë shkojnë në Tehran. Me dokumenta”, tha Berisha.
“14 maji ka një rëndësi të jashtëzakonshme, sepse çdo votë në drejtimin e gabuar, është votë për regjim absolut, për pushtet absolut. Askush nuk ka të drejtë të ankohet më, në rast se voton Edi Ramën, se pse po ndodhin këto, se pse po vidhemi në këtë mënyrë, se pse po largohemi në këtë mënyrë, se pse po shkelmohen të drejtat tona, pse nuk marrin dot një vendim gjykatat. Pse policia sillet siç sillet këtu me arbitraritetin më të madh dhe dënoj qëndrimet brutalet të saj këtu, ndaj qytetarëve. Ky është“, u shpreh ai më tej.
