Pas operacionit për heqjen e apendicitit, kryeministri Edi Rama është rikthyer në fushatë elektorale për të prezantuar Rakip Sulin në Kamëz.
Edhe pse ka ‘caktuar’ Enkelejd Alibeajn si opozitë, Rama nuk i ndali sulmet ndaj Sali Berishës dhe Ilir Metës.
Ai tha se ‘detyrë më e rëndësishme është heqja e apendicitit me 2 koka të shumë viteve’, duke iu referuar kundërshtarëve politikë.
Pasi sulmoi kandidatët e tij në Tiranë dhe Kavajë, Rama vazhdoi fyerjet edhe ndaj Rakip Sulit në Kamëz, duke e quajtur gomar.
“Kuptova që apendiciti qenka përgjithësisht një hall për të rinj, por në të gjitha rastet, erdhi në një moment kur kemi një apendicit më të rëndësishëm për të hequr, që është apendiciti i dhimbshëm i shumë viteve me dy koka, emrat e të cilave nuk po i përmend që mos e prishim kënaqësinë e kësaj feste të gjelbër. Dhe duke luftuar me mjekët, edhe me stafin tim për të dalë nga kafazi, ata kanë të drejtën e tyre, më në fund ju mora një takim jashtë zyre dhe shtëpie dhe midis të gjitha opsioneve ju thashë do shkoj te Rakip Suli në Kamëz sepse këtu është pasqyra më kuptimplotë e fjalës Rilindje”.
“U desh Rakip Suli që t’i jepej një herë të vetme në 30 vjet besimi PS-së që shumë njerëz në Kamëz ta kuptojnë se ky liqen nuk është as i madh dhe as i djathtë. Këtu është puna për gamorin që do merrini t’i shërbeni, me kurriz të fortë apo me dy vesh të gjata. Doni që kur të shkoni te bashkia t’ia vendosni drutë dhe t’i thoni hec bre apo dy vesh të gjatë e bishtin në shalë, edhe rrugët 4 metra, 7 gropa dhe emrin e Donald Trump. Unë them që zgjedhja është e thjeshtë, kush do fusi gomarin me vesh të gjata, ta harrojë mbështetjen nga qeveria, ne nuk mundet kurrë të na venë para faktin të kryer, me demek votën dhe të bashkëpunojmë me individë të shpallur non-grata”, tha Rama.
