Mbi 14 kg heroinë është sekuestruar në një automjet në afërsi të Rinasit, ndërsa është arrestuar një person.
Në pranga u vu 31-vjeçari Armando Papa, banues në Fushë Kuqe, Kurbin, konfirmoi policia, ndërsa u shpall në kërkim një tjetër person me iniciale R.G., banues në Sukth.
Papa ishte nën drejtimin e automjetit tip “Benz” ku efektivët gjetën sasinë e drogës, ndërsa roli i të shpallurit në kërkim nuk përcaktohet në një njoftim të zyrtarë të Policisë së Tiranës për rastin.
Aksioni
Aksioni i koduar “Fusha e kuqe” i kryer nga Seksioni për Hetimin e Narkotikëve në DVP Tiranë erdhi bazuar në inteligjencën informative, se një sasi e madhe lënde narkotike heroinë po transportohej me një automjet tip “Benz”, njoftoi policia.
Efektivët kanë lokalizuar automjetin e dyshuar dhe janë vënë në ndjekje të tij. Në afërsi të rreth-rrotullimit të aeroportit, kanë bërë ndalimin e mjetit.
Gjatë kontrollit në automjetin tip “Benz”, u gjet në bagazh një kuti me 62 pako. Brenda të cilave kishte 41 kg e 700 gram lëndë të dyshuar narkotike heroinë, të cilat u sekuestruan në cilësinë e provës materiale së bashku me automjetin dhe 1 mjet prerës.
Të njëjtat burime shtojnë se policia dhe prokuroria e rrethit po vijojnë hetimet për identifikimin e personave të tjerë të implikuar në këtë veprimtari kriminale.
Nisur nga paketimet e drogës, dyshimet e policisë janë se droga do të shkonte në disa destinacione.
Papa nuk tregon bashkëpunëtorët
Armando Papa, sipas burimeve policore, nuk ka treguar asgjë mbi bashkëpunëtorët e tjerë të mundshëm dhe as destinacionin për ku ishte nisur për të dërguar lëndën narkotike.
Sasia e heroinës së sekuestruar vlerësohet se kap vlerën e mbi gjysmë milioni Euro në treg, nëse do të ishte shitur në doza. Burime nga policia bëjnë me dije se origjina e lëndës narkotike dyshohet se ishte nga Turqia.
