Kryetari i PD-së Sali Berisha e quajti korruptive marrëveshjen mes qeverisë dhe kompanisë “Bechtel” – që llogaritet rreth 1 miliard euro – për ndërtimin e hidrocentralit të Skavicës.
Berisha u shpreh ndërtimi i këtij hidrocentrali që ka shqetësuar banorët e zonës do të sjellë përmbytje duke zhdukur dhjetra fshatra.
Kryedemokrati tha gjithashtu se kompania “Bechtel” ka nisur shitjen e aksioneve.
“Janë vërsulur të mbysin Dibrën. Skavica është varri i Dibrës. A do pranojmë ne të bëhemi mortorë në varrimin e saj? Të largosh 20 mijë banorë, çfarë mbetet në Dibër? E gjitha vepër korrupsioni, e gjitha vepër hajnie. Projekt i Enver Hoxhës. Por diktatori e kishte mbyllur nga të katër anët Shqipërinë dhe bëri digat. Dibrën vendosi ta çoj në Hoxharë. Megjithatë nuk guxoi. Përmbysi fshatra të mrekullueshëm, por ajo që përmbyste më shumë ishte Skavica. U ndal. Një vend i lirë, që ka mundësi me erë dhe diell, të shkojë dhe të përmbysë 32 fshatra, të përmbysë një krahinë, duhet të jesh pa asnjë ndjenjë njerëzore ose nuk duhet të jesh normal nga kapacitetet mendore të marrësh një vendim të tillë. Afera e Skavicës është një aferë korruptive. Eshtë kontratë pa garë dhe këto kontrata pa garë janë korruptive”, tha Berisha.
“Tani po shet aksionet, i bëj thirrje qeverisë britanikë të mos lejojë kompanitë britanike të blejnë aksione. Sepse Dibra nuk mund të varroset. Dibra do ecë në shekuj dhe mijëvjeçarë e lirë”, shtoi ai.
Deklaratat i bëri nga Dibra, ku këtë të Shtunë u prezantua kandidati i koalicionit opozitar “Bashkë Fitojmë” për këtë bashki Ismail Uka, për zgjedhjet lokale të Majit.
Berisha tha se “më 14 maj janë zgjedhjet e jetës sonë”, ndërsa bëri apel se “duhet të ndalim shpopullimin” për të cilin bëri përgjegjës qeverinë e Edi Ramës.
Zgjedhjet më 14 maj janë zgjedhje për rivendosjen e pluralizmit, theksoi Berisha, ndërsa bëri apel për votimin e kandidatëve të koalicionit opozitar.
