Një 33-vjeçar shqiptar është arrestuar nga policia britanike pasi u kap duke transportuar kanabis me vlerë gati 10,000 paund.
Mediat e huaja bëjnë me dije se në prang aka rënë shqiptari, Mond Karaj, i cili ka jetuar në Mbretërinë e Bashkuar për pesë vjet, por nuk i është dhënë statusi i imigrimit.
Karaj punonte si korrier droge në qytete të ndryshme.
Më 26 tetor 2021, shqiptari u arrestua pasi kur policia e ndaloi për kontroll në makinë iu gjet një qese e mbyllur që përmbante 985 gramë kanabis, e cila kapte vlerën e gati 10,000 paund. Në fillim ai tha se droga i përkiste një shoku që kishte përdorur makinën më herët atë ditë. Megjithatë, ai e ndryshoi version kur u paraqit në gjykatë dhe deklaroi se ishte korrier për drogën që i ishte gjetur.
Gjurmët e gishtërinjve të tij ishin gjetur në një qese të mbyllur me vakum, që do të thoshte se ai e kishte mbyllur çantën përpara se të transportonte drogën. Avokati mbrojtës i shqiptarit tha se vendimi i gjykatës do të ndikojë në vendimin e Home Office nëse ai mund të qëndrojë në Mbretërinë e Bashkuar. Gjykatësja tha se koha që Karaj ka kaluar në paraburgim e ka bërë të reflektojë dhe ai është sjellë mirë.
Për këtë arsye vendosi që dënimi i tij të ishte 12 muaj nën mbikëqytjen e shtetit dhe urdhëroi që ai të kryente 120 orë punë pa pagesë.
