Autostrada Tiranë-Durrës është përmbytur si rezultat i reshjeve të shiut në pasditen e sotme. Situata e rënduar është paralajmëruar prej disa ditësh, por duket se gjithshka ka rënë në vesh të shurdhët. Emergjencat Civile janë dorëzuar, pasi nuk mund të ndërhyjnë në një situatë të tillë për shkak se mungojnë kapacitetet.
Kreu i Emergjencave Civile, Shemsi Premçi, thotë se është përgjegjësi e kompanisë që mirmban rrugën për të ndërhyrë.
Policia e Shtetit përmes një njoftimi bëri të ditur se në autostradën Tiranë -Durrës, përballë karburant Kastratit është bllokuar qarkullimi i mjeteve, pasi niveli i ujit në karrexhatë ka arritur mbi 0,75 metra
Policia Rrugore ka marrë masa duke devijuar qarkullimin e mjeteve në rrugën dytësore përballë me karburantin.
Policia Rrugore ka dërguar përforcime me patrulla shtesë.
Policia Rrugore kërkon mirëkuptimin e drejtuesve të mjeteve dhe rritjen e kujdesit në rrugë gjatë drejtimit të automjetit.
