Vendimi i kreut të KQZ, Ilirjan Celibashi për të njohur Lulzim Bashën si kryetar të PD, pasi sipas tij e përcakton ligji, është për kreun e Partisë së Lirisë, Ilir Meta çmenduria e radhës e regjimit të Edi Ramës, pas vendimit të Gjykatës së Apelit për vulën e demokratëve.
Teksa KQZ i la 48 orë kohë grupit “Alibeaj” për ta dorëzuar dokumentacionin e plotë për t’u regjistruar me firmën e njomë të Lulzim Bashës kryetar të tyre, Meta u shpreh se këto janë lojëra të kryeministrit.
“Qëndrimi im është dhe mbetet një, respekti i vullnetit dhe anëtareve të PD i cili është demonstruar në mënyrë publike dhe transparente përmes foltoreve dhe në zgjedhjet e pjesshme të 6 marsit të vitit të kaluar. Po ashtu është demonstruar dhe nga akti që PD ka marrë. Çmenduritë e regjimit të Ramës. Mënyrën sesi ai pengoi regjistrimin e gjykatës dhe lojërat e tanishme. Më 14 maj, PL dhe opozita e vërtetë do të jetë atje. Asnjë votë nuk do të preket. Nëse dikush guxon ta prekë do mbajë përgjegjësi. Për shkak të krimit të organizuar është vendi i parë nga ku njerëzit ikin me vrap duke rrezikuar jetën”, tha Meta.
