Ish-kryeministri, Sali Berisha, ka sulmuar ambasadoren Yuri Kim lidhur me takimet që zhvilloi sot me kryetarët e partive politike për zgjedhjet e 14 majit, vetëm një ditë para se KQZ të vendosë se kë do të regjistrojë në zgjedhje nën logon e PD-së, Alibeajn apo Berishën.
Gjatë një takimi me demokratët e Mallakastrës, Berisha shprehet se diplomatja Kim nuk ka asnjë moral para shqiptarëve të flasë për zgjedhjet.
Berisha: Ata që u përpoqën t’ju tradhëtojnë ju, t’ju futin thikën ju, ata kanë përfunduar dhe përfundojnë në koshin e plehrave të shoqërisë. McGonigal përfundoi të shkatërronte opozitën si vrasës i paguar nga Edi Rama. Ja ku është Lulzim Brava i cili u mor peng nga Edi Rama me proces gjyqësor dhe pastaj thoshte se po më urdhëron në mënyrë të tmerrshme ambasadorja amerikane. Tani i them: Zonjë ja ku e ke, një kalbësirë, një kufomë politike, ja ku e ke, merre.
Kundër PD, kundër jush, kundër demokratëve u vërsul me të njëjtën egërsi si McGonigal, McGonigali me fustan Yuri Kim. Pas dy muajsh u bë e gjallë sot. I them nga këtu se nuk ke asnjë moral, asnjë të drejtë të flasësh për zgjedhjet në këtë vend. Ti je e para që shkove dhe urove Edi Ramën me urdhër të McGonigal zgjedhjet më të vjedhura, më të rrënuara, më të plaçkitura në historinë e vendit. Mos mendo ti se mund tu shesësh për moral shqiptarëve amoralitetin. Shqiptarët kanë shumë probleme, por janë inteligjentë, nuk ua hedh dot. Të duket se ua hedh por askush nuk ua hedh atyre
