Kreu i Partisë së Lirisë, Ilir Meta e ka etiketuar si “kastravec” kryeministrin Edi Rama, i cili sipas tij, po përpiqet që të marrë peng “vulën” e Partisë Demokratike duke i dhënë fund pluralizmit në vendin tonë.
Gjatë fjalës përballë protestuesve, Meta shprehu hapur solidaritetin me PD dhe theksoi se pluralizmi është shtylla e Shqipërisë demokratike, është garancia për të mbrojtur çdo qytetar.
Nga thirrja e Ilir Metës sot përpara Kuvendit të Shqipërisë, në mbështetje të Partisë Demokratike:
“Edhe njëherë mirënjohjen më të thellë për të gjithë ju dhe të gjithë, çdo ditë këtu! Solidaritet me deputetët e vërtetë opozitarë! Me ata që justifikojnë sakrificat e 750 mijë votuesve, por njëkohësisht edhe me Partinë Demokratike, sepse nuk kemi në diskutim çështjen e Partisë Demokratike, sepse atë e kanë zgjidhur demokratët vetë, në mënyrën më transparente, në mënyrën më evropiane, në mënyrën më demokratike.
Këtu kemi një “kastravec”, i cili kërkon të provokojë shqiptarët në ndjenjën më të fortë të dinjitetit njerëzor dhe të atij kombëtar. Ne, pluralizmin politik nuk e këmbejmë me asgjë sepse pluralizmi është shtylla e Shqipërisë demokratike, është garancia për të mbrojtur e çdo qytetari, sepse një “kastravec” që kërkon të marrë vulën e një partie që e ka shkruar historinë e saj me sakrifica, me dëshmorë dhe sakrificat më sublime, pa asnjë diskutim mendoni se çfarë bën ky “kastravec” me pronat e shqiptareve, me hipotekat e tyre”, u shpreh Ilir Meta.
