Kryetari i Partisë Demokratike, Sali Berisha ka hedhur akuza të forta në drejtim të kryeministrtit Edi Rama dhe Sekretarit të Përgjithshëm të PS, Damian Gjiknuri në lidhje me skandalin e pagesave ndaj ish-drejtorit të Kundërzbulimit të FBI, Charles McGonigal, i cili është arrestuar nën akuzat për korrupsion.
Sipas Berishës, kryeministri i Shqipërisë ka paguar McGonigal-it për të lobuar kundër opozitës dhe Partisë Demokratike.
“Të dashur qytetarë, këto ditë Shqipëria gjendet në epiqendër të një cikloni që do pushtonte çdo vend të madh. Kryeministri i Shqipërisë, ministrat e tij, këshilltarët, janë të implikuar direkt në një aferë korruptive në korruptimin e njërit prej njerëzve me njohuri të një institucioni më sensitiv në SHBA për sigurinë e këtij vendi dhe të vendeve të lira. Prej muajsh një juri ka urdhëruar hetimin e çdo mesazhi, takimi, udhëtimi, çdo dhurate, çdo e-maili dhe gjithçka tjetër midis Mcgonigal dhe Duçkën, Nezës dhe Ramës. Kjo juri e citon në vendimin e saj Edi Ramës dhe vetëkuptohet se për të bërë një kontroll të tillë, nuk bëhet pa vendosur nën hetim personat e sipërcituar. Skandali shpërtheu në mënyrën më të fuqishme pas arrestimit në aeroportin e SHBA të ish-zyrtarit nga FBI, i cili akuzohet se në raport me kryeministrin e Shqipërisë ai ka fshehur, manipuluar, falsifikuar, dokumente. Akuzohet se ky njeri i pafytyrë, pa karakter, që ka shkelmuar interesat e vendit të tij, ka marrë porosi me para nga zyra e kryeministrit shqiptar, për të hetuar lobimin e opozitës, për të manipuluar”, tha Berisha.
Por përveç kësja Berisha u ndal edhe te roli i oligarkut rus Oleg Deripaska, i cili e ka paguar Charles McGonigal për ta hequr emrin e tij nga lista e personave të sanksionuar prej SHBA-ve për lidhje me Vladimir Putin.
Berisha deklaroi se Deripaska i ka shtrirë tentakulat e tij në të gjithë sektorët e ekonomisë shqiptare dhe njeriu i tij kryesor në qeverinë shqiptare është ish-ministri i Energjisë dhe Infrastrukturës, Damian Gjiknuri.
“Nuk mund të ketë sot debat tjetër përveç këtij debati. Shqiptarët duhet të marrin vesh të vërtetën. Edi Rama të vijë këtu të japë dorëheqjen dhe të shkojë të dëshmojë në SHBA. Çfarë doni më shumë se kaq? A e dini kush ishte McGonigal, funksioni i tij, që i çuat ju paratë e kompanive të oligarkut rus. E dini ju se Deripaska i ka tentakulat e tij në të gjithë sektorët e ekonomisë shqiptare. A e dini ju se Damiani juaj është zëdhënës kryesor i interesave ruse në Shqipëri”, theksoi Berisha.
Akuzat e Berishës duket se nuk janë të pabaza, pasi siç edhe BoldNews.al ka raportuar më herët gjatë ditës, Damian Gjiknuri që është përzgjedhur nga Rama si njeriu që ka për detyrë të sfumojë politikisht skandalin e “agjentit të FBI-së” dhe mikut të tij, Charles McGonigal, është edhe vetë një personazh jo shumë larg kësaj historie.
Madje, firma e tij gjendet në dokumentat që favorizojnë bizneset në Shqipëri të oligarkut rus Deripaska, por edhe personazheve të tjerë të përmendur në dosjen amerikane.
LEXO EDHE:
https://boldnews.al/2023/01/26/rastesi-pas-cdo-fije-ruse-ne-naften-shqiptare-del-emri-i-damian-gjiknurit/
