Kuvendi është kthyer në një arenë përplasjesh mes opozitës dhe mazhorancës. Çështja e arrestimit të ish-zyrtarit të FBI-së, Charles McGonigal, i akuzuar për korrupsion dhe marrjen e pagesave për të lobuar dhe ndryshuar vendime të SHBA-ve nga oligarkë rusë dhe dyshimet për pagesa nga ana e kryeministrit Edi Rama, ka tensionuar situatën në Kuvend.
Lindita Nikolla përjashtoi Berishën nga seanca plenare, ndërkohë kreu i PD-së Sali Berisha është futur live në Facebook.
Berisha: Nuk tërhiqemi sot sepse kemi detyrim për sigurinë kombëtare, kemi detyrim për transparencë të plotë të miqësisë të McGonigal dhe lidhjeve të tij me Agron Nezën dhe Dorian Duçkën. Rama përdori McGonigal për pushtetin e tij dhe për të rrëzuar opozitën. Përpjekjet tuaja për të shuar zërin e opozitës janë të dështuara, ne nuk largohemi.
Si ka mundësi një kryeministri i një vendi partner të korruptohet? Nuk kaloni dot ju sot mbi këtë skandal, shqiptarët presin të vërtetën nga ky parlament. Ju keni frikë nga e vërteta sepse jeni të zhytur.
Gazment Bardhi: Ka një kërkesë nga PD që Edi Rama është kapur në flagrancë duke korruptuar zyrtarë të huaj…
Sali Berisha: Silleni këtu, silleni këtu…
Gazment Bardhi: Të japë dorëheqjen!
Sali Berisha: Kryeministri më i korruptuar i botës dhe Evropës, si doni t’ia fshihni shqiptarëve këtë akt?
