Pas disa telasheve gjatë javës, Partizani duket se ka arritur të rikuperojë në kohën e duhur pjesën më të madhe të titullarëve, që kanë pasur probleme. Pauza prej gjashtë ditësh që nga ndeshja me Kukësin e ka ndihmuar shumë Kolelën dhe mjekët për të arritur të sjellin në kushtet e duhura fizike lojtarët.
Kështu, i vetmi që nuk do të jetë pjesë e betejës së sotme, diçka që e pranoi edhe trajneri Kolela në konferencën para ndeshjes, është Viktor da Silva.
Fantazisti brazilian vijon të ketë probleme muskulore dhe pavarësisht se është kthyer të vrapojë në fushë në ditët e fundit, nuk do të luajë në këtë derbi.
27-vjeçari mbyll në këtë mënyrë vitin dhe nis punën për të qenë gati në startin e 2023-shit, kur rinis kampionati.
Nga ana tjetër, lajme të mira ka nga Matondo, i cili fatmirësisht nuk ka pasur dhimbje ditën e djeshme dhe ka dhënë sinjalin se është gati për një nga sfidat më vendimtare të sezonit.
E njëjta gjë vlen edhe për Engjëll Hotin, Maget Gueje dhe Andi Hadrojn, të cilët kanë pasur gjithashtu shqetësime.
FORMACIONI – Luhet derbi dhe vështirë që trajneri Kolela do të hyjë në aventurë duke rreshtuar lojtarë që nuk i ka aktivizuar rregullisht.
Në portë do të jetë Rexhepi, teksa para tij pritet të jetë katërshja klasike me Bitrin dhe Sotën në qendër dhe Buxhelajn e Hadrojn në anët e difensivës.
Edhe në mesfushë do të jenë emrat e zakonshëm, me Matondon, Rrapajn dhe Muratajn. Dilema e vetme është në sulm, aty ku trajneri duhet të vendosë mes Mensah dhe Hotit.
Ky i fundit vjen nga dëmtimi, ndërsa ganezi u “ngul” në stol nga Kolela në sfidën me Kukësin. Skuka dhe Cara pritet të plotësojnë repartin ofensiv.
/Panorama Sport/
