Kreu i Partisë Demokratike, Sali Berisha ka vijuar me sulmet dhe akuzat e forta ndaj ambasadores së SHBA-së në Tiranë, Yuri Kimit.
Gjatë një deklarate për mediat nga selia blu, Berisha ka theksuar se Yuri Kim mbron dështimin e Reformës në Drejtësi ose siç e quan lideri historik i PD-së: “Reformën e George Soros në vendin tonë”. Sipas Berishës, ambasadorja Yuri Kim mban peng me dosje kreun e qeverisë.
Sali Berisha: “Çfarë qëndron në themelin e betejës së Yuri Kim? Unë ju ftoj të lexoni, nuk gjeni sot në planet një vend të dytë, dhe unë kam bërë kërkime, nuk gjendet një vend të dytë ku një ambasadore të sillet siç sillet guvernatorja në Tiranë. Çfarë kujtoni se mbron ajo? Mbron në minimum dështimin e reformës së Sorosit në Shqipëri. Por mundet edhe më shumë. Ajo mbron mashtrimet që i ka bërë shefave të vet, ajo mbron veten sepse ka përdorur korrupsionin për të luftuar antikorrupsionin në Shqipëri. Ndaj dhe ajo nuk njeh kufi, ndaj edhe sillet. Po pse sillet në këtë mënyrë? Sepse e ka peng me dosjen Edi Rama. Nuk ndodh kurrë në botë kjo. Nuk kam lexuar kurrë që në mënyrë kaq të paskrupullt, kaq jodinjitoze, kaq fyese për një popull dhe vend sovran, të sillet një përfaqësuese e vendit që konsiderohet partneri strategjik më i rëndësishëm”
