Kreu i PD-së Sali Berisha deklaroi këtë të premte se një qytetar në Tiranë ka ndërruar jetë për shkak se qeveria po e lë pa shtëpi.
Gjatë një konference për media, Berisha thotë se për shkak të ndërtimeve që po bëhen në zonë nga deputeti i PS-së Xhemal Qefalia, viktimës i ishin prerë uji dhe dritat, si dhe i ishin dëmtuar themelet e pallatit, duke bërë që të vdiste nga stresi, sindromi i plasjes së zemrës.
“Një qytetar ndërroi jetë nga stresi, nga sindromi i zemrës së plasur sepse po e nxjerrin me forcë nga shtëpia.
Cila është historia?
Pas tërmetit, ekspertët u kanë dhanë banorëve të këtij pallati, klasifikimin se pallati i tyre nuk ka dëmtime të rëndësishme. Kam një titull të vitit 2019, që se si luhet me jetët e 90 familjeve nga Qefaliaj. Ky i fundit ka ndërtuar aty dhe u ka prishur themelet. Në mënyrë barbare u presin dritat dhe ujin.
Mbrëmë ai ndërroi jetë nga sindromi i plasjes së zemrës një qytetar që e shihte veten në humnerë totale, që e nxirrnin me forcë.
Këto ndodhin se si në asnjë vend të botës, në Shqipëri konfiskon kryeministri. Nuk konfiskon gjykata. Këto janë zhvillimet e një revanshi që po nuk e ndalëm, do të përmbysë edhe më keq shoqërinë dhe shtetin shqiptar”, tha Berisha.
Ish-kryeministri Sali Berisha foli dhe për reformën në drejtësi, të cilën e cilësoi si një gjëmë ndaj qytetarëve shqiptarë. Ai nënvizoi se reforma la pa një proces të rregullt gjyqësor qytetarët shqiptarë duke i lënë të presin dhe deri në 20-vjet për një vendim.
