Kryetari i Partisë Demokratike, Sali Berisha ka lexuar në Kuvend një denoncim për serën e kanabisit që u zbulua një muaj më parë në Berat.
Berisha tha se ka qenë ministri i cili ka urdhëruar drejtorin e policisë së Beratit që sera të mos prekej.
“Çfarë lidhje ka Rama me 5 tonë drogë që erdhën në Çervenak. E kujt ishte Sera e Beratit? Jua them unë. Mirëmbrëma doktor. Më datë 11 nëntor në Berat është goditur një serë me kanabis dhe janë sekuestruar mbi 2 ton kanabis dhe sasi e madhe gati për mbjellje. U përjashtuan nga policia gjithë zinxhiri drejtues i drejtorisë së Beratit. Vetëm drejtori i Policisë, Edmond Targaj u kalua në akademinë e policisë. Nga informacioni i sigurt, drejtori i Beratit ishte menaxhues i aktivitet kriminal. Në këtë situatë, Edmond Targaj shkoi tek ministri i familjes Çuçi. Dhe i tregoi se unë, s’kam bërë gjë tjetër veçse kam zbatuar porosinë e bosit të drogës në ministri, Aranit Arapi, i cili më ka folur në emrin tuaj. I tregojnë komunikimin me SMS. Në të cilën Arapi i thoshte, ministri kërkon që ajo sera të mos preket”, shprehet Berisha.
Berisha u shpreh se pas kapjes së lëndës narkotike, u shkarkua i gjithë zinxhiri drejtues i policisë së Beratit, përveç drejtorit, Edmond Targajt.
“Ky pas kësaj bisede, anuloi largimin e Targës nga Policia e Shtetit. Çfarë është Gerti në krahasim me këtë. Ai mori një dorë parash, nga Edi Rama e mori, nga ky e mori, por këta janë shumëfishi i tij. Këta nuk janë rrezik personal për askënd, por rrezik personal për çdo njeri. Ju bëj thirrje, për beteja të reja. Ju bëj thirrje të ngrihemi se kjo kalbësirë nuk ikën ndryshe përveçse me revolucion. Ata që kanë frikë nga revolucioni, ata janë skllevër të krimit. Janë mostra të krijuara nga skllavëria e krimit. Revolucioni nuk duhet të trembë askënd. E shihni me kë jam në Parlament. Prapë do vij, derisa të përzëmë kriminelin e fundit në këtë Parlament. Ndaj dhe mora fjalën edhe një herë për t’i deklaruar Edi Ramës se kauzën tonë nuk e vret dot”, përfundon Berisha.
