Në harkun kohor të tre ditëve sipër “Lasgushit” të “Air Albania”, kryeministri Edi Rama ka qenë në fluturim, duke mos humbur asnjë minutë pas mbylljes së Samitit BE-Ballkani Perëndimor për t’u larguar nga Tirana.
Shefi i qeverisë ka marrë pjesë në disa forume, krejt pa rëndësi për Shqipërinë dhe shqiptarët.
Rama fillimisht u ndal në Bruksel, ku nuk e kaloi fjalën e tij pa lajka përkundrejt Ursula Von der Leyen dhe Charles Michel pas alokimit të fondit 85 mln euro për vendin tonë, ndërsa më pas u ngrit sërish në “ajër”, këtë herë me destinacion Azerbajxhanin.
Në Baku Rama takoi Presidentin Ilham Aliyev, por askush nuk e kuptoi motivin e vizitës. Dhe sikur të mos mjaftonte, kryeministri u ndal mëngjesin e sotëm në Stamboll, aty ku ka takuar mikun e tij Rexhep Taip Erdogan në kuadër të punimeve të “TRT World Forum”.
E pas lajkave ndaj liderëve të BE-së, në Stamboll, Rama ka dhuruar “show-n” e radhës teksa i ka rrahur shpatullat Erdoganit, duke e cilësuar edhe si “Ujkun e Europës”.
Kreu i qeverisë shqiptare i ka dhënë merita Presidenti turk për mënyrën sesi Europa përballoi fluksin e emigrantëve pas luftës në Siri dhe diplomacinë që sipas tij Erdogan ka treguar në bisedimet për konfliktin e armatosur në Ukrainë, duke zhbllokuar edhe tregtinë ndërkombëtare të drithave.
“Duket se sistemi ndërkombëtar ka dështuar, padyshim Turqia ka kontribuar shumë në sigurinë. Kemi një partneritet të ngushtë me të, në kohën kur u sulmua dhe Ukraina. Përballë këtyre sfidave të reja që vijnë, le të kthehemi pas pak në kohë, në ato momente vendimmarrëse për historinë e Evropës, kur kriza e emigrimit nisi që nga viti 2016. Pa Angela Merkel dhe pa Evropën ne nuk do të ishim të sigurtë. Ishim të mirëpritur, por pa ujkun e Evropës, nuk do të ishte e mundur. E gjithë kjo ka ardhur si pasojë e rregullave të caktuar. Duhet të jeni pjesë e komunitetit evropian. Ideja lindi për të treguar se kush…referuar kësaj ideje që shkon e vjen, pa diskutim pa kastin evropian, pa energjinë, pa sigurinë, traditat e sulmet kibernetike, duhet një platformë evropiane e gjithëpërfshirëse, për të parë se si Rusia do të vijojë me luftën në Ukrainë”, tha Rama.
