Deputeti i Partisë Demokratike Luçiano Boçi ka komentuar sjelljen e kryeministrit Edi Rama në Kuvendin e Shqipërisë.
Ai shprehet se leksiku i zgjedhur i Edi Ramës ngjan me fjalimet e viteve të shkuara kur nga e njëjta foltore betohet se inceneratorët do ishin shpëtimi për plehrat në Shqipëri.
“Nëse ka zgjedhur t’i shkojë deri në fund marrëzisë për t’i rrëmbyer shqiptarëve portin i ka bërë llogaritë gabim”, shkruan ai.
Deklarata e plotë nga Luçiano Boçi:
“Sa herë që e dëgjoni të ulëras dhe të shaj, dijeni se e ka një hall
Për këdo që është çuditur me qulljen e Edi Ramës në seancë teksa fliste për megaaferën e “Portit të Durrësit” më së paku duhet t’i kuptojnë hallin! Duhet kuptuar halli i dikujt që duke u fshehur pas Mit’hat Frashërit, Ismail Qemalit, Gjergj Fishtës, Napoleonit dhe Fan Nolit përpiqet t’i hedh hi sy shqiptarëve për vjedhjen e pasurisë së tyre më të madhe kombëtare.
Leksiku i zgjedhur i Edi Ramës ngjason shumë me fjalimet e viteve të shkuara kur nga e njëjta foltore betohej dhe përbetohej se inceneratorët do të ishin shpëtimi për “plehërat që kishin mbytur” Shqipërinë. Për ironi të këtij shpëtimtari të madh të shqiptarëve, teksa në Parlament flitej për aferën e Portëve të Durrësit nga Edi Rama, deputeti i tij dënohej me burg për Inceneratorin e Elbasanit!
Nëse ka zgjedhur t’i shkojë deri në fund marrëzisë për t’i rrëmbyer shqiptarëve portin i ka bërë llogaritë gabim. Koha kur shokët e tij bënin burg për shefin e tyre nuk do të përsëritet. Faturën e madhe që po i prodhon shqiptarëve do të duhet ta paguaj ai vetë!”
