Kreu i Partisë Demokratike, Sali Berisha përcolli një mesazh falënderimi për të gjithë qytetarët që iu përgjigjën thirrjes së tij për të dalë në protestën e 12 nëntorit për të protestuar kundër qeverisë Rama.
Gjatë një deklarate për mediat, Berisha tha se protesta arriti qëllimin për të dridhur sipas tij “qeverinë moniste që bazohet në vjedhjen e votës”. Gjithashtu Berisha theksoi se protesta shembullore e qytetarëve i dha një mesazh të qartë europës dhe mbarë botës me misionin e vetëm për të përmbysur qeverinë.
“Sot jam para jush për të shprehur falenderimet më të përzemërta, mirënjohjen më të pakufishme për ata qindra mijëra burra, gra, djem dhe vajza nga Tirana, por dhe të katër anët e Shqipërisë, nga emigracioni dhe diaspora që me praninë e tyre në protestën më madhështore, më të fuqishme që Tirana ka njohur në tërë historinë e saj, firmosën aktin e kthesës së madhe të popullit opozitar, inauguruan fillimin e një beteje e cila nuk ndalet më gjer në përmbysjen e sistemit monist, derisa shqiptarët të votojnë të lirë, njëlloj si qytetarët europianë, derisa shqiptarët të mos vidhen në mënyrë të tmerrshme nga një qeveri që s’ka ligj as moral me në krye Edi Ramën, derisa shqiptarët të mos varfërohen dhe mjerohen nga muaji në muaj.
Të dashur qytetarë dhe qytetare, protesta e 12 nëntorit ishte zenith e protestave krahasuar me numrin e popullatës e protestave në botë. Ajo dridhi themelet e një monizmi që bazohet në vjedhjen e votës, vjedhjen e fondeve publike, vjedhjen e pasurive publike nga Edi Rama, në frikën shantazhin, drogën dhe krimin. Ai ishte mesazhi më i shkëlqyer që qytetarët fisnike të Tiranës dhe mbarë Shqipërisë u dërguan shqiptarëve kudo që janë. Ata u dërguan atyre mesazhin e shpresës, besimit, fitores.
Por njëkohësisht, protestuesit u treguan kancelarive të Europës dhe botës se krahas monizmit në Shqipëri ekziston edhe një popull i tërë i ngritur në këmbë, për ta hedhur në Lanë, për ta përmbysur këtë regjim”, u shpreh Sali Berisha.
