“Edi Rama ka kaluar çdo vijë të kuqe”. Kështu u shpreh këtë të Mërkurë kryetari i PD-së Sali Berisha, gjatë një takimi me banorë të degës 4 së PD-së në Tiranë.
Gjatë fjalës së tij, Berisha akuzoi qeverinë dhe kryeministrin Edi Rama për vjedhje të qytetarëve.
Kreu i PD-së u ndal dhe te projekti i Portit të Durrësit, duke deklaruar se po e merr klani Rama-Vuçiç-Karriç, bashkë me Llukashenkon e Bjellorusisë.
“Ky u thotë se unë udhëtoj me avion, 22 milionë euro, 137 udhëtime me çarter. Nuk janë paratë tuaja këto. Blen instilacionin për ta vendosur në oborrin e brendshëm të kryeministrisë ku nuk e shikon asnjë njeri, 4 milionë euro. Nuk keni punë thotë, çfarë ju duhet ju se çfarë bëj me paratë. Por paratë nuk janë as ndonjë trashëgimi e Edvin Kolekës, as ndonjë minierë në Surrel, janë të gjitha mund e djersë e juaja. Janë kafshatë, taksa mbi të ardhurat tuaja, mbi çdo gjë që blini, ose borxhe që merren. Edi Rama dhe kjo qeveri ka shfrytëzuar fatkeqësitë jo për të ua lehtësuar ju qytetarëve gjendjen në këto fatkeqësi, por për të ua rënduar sa më shumë gjendje…”, u shpreh Berisha.
“Mburrej sot në parlament se kemi rritur të ardhurat. Sigurisht nëse dyfishohet TVSH-ja për shkak të rritjes së çmimit, natyrisht qytetarët i paguajnë ato. Por çfarë bënë qeveritë të cilat e kuptojnë kanë ndërgjegje se janë para që u grabiten qytetarëve? Ua kthejnë atyre. Ua ktheu qeveria e Kosovës, 100 euro çdo pensioniste, studentin, punonjësit të ndërmarrjeve publike, 400 euro çdo fermeri për një hektar grurë, ua ktheu bizneseve për të përballuar çmimet. Çfarë ktheu ky? Cili prej jush ka ndjerë një lehtësim nga kjo peshë e rëndë? Asnjë. Përveç ortakëve të tij që vjedhin çdo orë në prokurorime. Edi Rama ka kaluar çdo vijë të kuqe. Ai është armik se ka shndërruar votën në fiktive. Në diktaturë votohej çdo 4 vite, por vota dihej, rezultati dilte ai që donte diktatori. Ndaj dhe sot ne mblidhemi këtu me vendimin për tu përballur me të dhe për ti dhënë atij përgjigjen që meriton”, shtoi ai.
Porti i Durrësit
Kreu i PD-së u shpreh se pronarët e rinj të portit të Durrësit fshihen nga qeveria.
“A e dëgjuat ju se si me procedurë urgjente po sjellin në parlament ligjin e privatizimit për veten e tij dhe Aleksandër Vuçiç të Portit të Durrësit. Porti i Durrësit ka një territor 1.2 milionë metër katror. Porti i Durrësit përbën si truall ndërtimi me vlerë minimumi 3 miliardë Euro. Porti i Durrësit i zhvilluar në ndërtime siç pretendon ai Dubai City, mund të shkojë në vlerë edhe 3 miliardë të tjera. Por kush janë këta që marrin portin? A ka shqiptarë që e dinë? Jo. Ju bëj thirrje durrsakëve të pyesin, se kush janë këta që po marrin portin e Durrësit. Kush e merr këtë pasuri përrallore publike të shqiptarëve. Ua them unë kush e merr. E merr një kompani në pamje të parë emiratesh, por në pamje të parë në thelb, Edi Rama, Aleksandër Vuçiç, Nebojsha dhe Dragomir Karriç, pra kompanitë e vëllezërve Karriç të cilët të gjithë aksionet i kanë me Llukashenkon e Bjellorusisë. Pra në vend që këtë pasuri ta gëzojnë shqiptarët, portin e tyre mijëra vjeçarë ta zgjerojnë, shndërrohet në pasuri private të klanit Rama-Vuçiç-Karriç dhe Aleksandër Llukashenkos”, deklaroi Berisha.
“Ai mund të thotë se këta nuk janë të vërteta? Dil e thuaju shqiptarëve se nuk janë të vërteta o hajdut. Kush janë pronarët e vërtetë të kësaj kompanie. E njëjta skemë përdoret në këtë rast, përjashtim nga taksat. Identike skema që Llukashenko ka përdorur me vëllezërit Karriç. Pra çfarë po ndodh me qytetarin. Pasuritë publike po shndërrohen në mallkim për qytetarin dhe parajsë për qeveritarët. Kjo ndodhte vetëm në sistemet mizore koloniale dhe kurrë në sistem demokratik”, shtoi ai.
