Policia ka arrestuar dy infermieret që dhunonin brutalisht një grua në “Shtëpinë e të Moshuarve” në Pejë. Lajmi është konfirmuar nga Veton Elshani nga Policia e Pejës.
Elshani tha se nuk e di se cilat nga infermieret që shihen në video janë arrestuar dhe ende nuk dihet identiteti i tyre.
“Dy prokurorët e shteti dhe Policia e Kosovës në vendin ku dyshohet së është kryer vepra penale, kanë identifikuar dhe arrestuar dy persona të dyshuar dhe të njëjtit me urdhër të Prokurorit të Shtetit janë ndaluar për 48 orë, nën dyshimin se në bashkëkryerje kanë kryer veprën penale “Sulmi” dhe veprën penale “ndihma në kryerjen e veprës penale Sulmi””, njofton prokuroria.
Video që na shokoi të gjithëve u publikua në rrjete sociale nga aktorja e njohur kosovare, Kaltrinë Zeneli.
Në video shihet teksa keqtrajtohet një zonjë e moshuar nga disa vajza të reja, infermiere. Zeneli nuk ka treguar se ku ka ndodhur rasti dhe në çfarë kohe, por u ka bërë thirrje autoriteteve dhe mediave që të ndjekin këtë ngjarje shqetësuese.
Infermierja shihet teksa e godet disa herë në fytyrë pacienten, ndërsa ajo është e pafuqishme që të mbrojë veten. Në video, përveç sulmit fizik, dëgjohen edhe ofendime e përulje ndaj zonjës së moshuar, edhe nga infermieret e tjera.
