Prokuroria ka marrë sot dëshminë e 6 mjekëve e infermierëve nga spitali i Traumës, për të hedhur dritë mbi rrethanat e vdekjes “misterioze” të Lear Kurtit pas shoqërimit në komisariatin nr.3 në Tiranë.
Për tre orë ata kanë treguar se 32-vjeçari mbërriti pa shenja jete në spital. Mjekët kanë dhënë ndihmë mjekësore por ka qenë e pamundur që të kthehet në jetë.
Po ashtu, sot ka nisur ekzaminimi i kamerave të spitalit pas dëshmive të mjekëve e kartelës mjekësore. Përveç mjekëve, policia rimori në pyetje 17 punonjës të Policisë së Shtetit. Deri më tani, nga të dhënat e administruara nuk rezulton se Lear Kurti të vuante nga epilepsia, pista e parë e deklaruar nga autoritetet. Gjithsesi, pritet ende rezultati përfundimtar i të gjitha hetimeve për të dalë në një konkluzion.
32-vjeçari dha shpirt duke u sorrollatur në duart e efektivëve të komisariatit nr.3 të Policisë së Tiranës. Ai u ndalua mbrëmjen e 19 tetorit nga efektivët dhe brenda 30 minutave ndërroi jetë. Por, mos-zbardhja e kësaj ngjarjeje vjen si pasojë e pretendimeve kontradiktore të palëve.
Ekspertiza paraprake ka dalë në përfundimin se s’ka pasur dhunë ndaj të riut, por që ka ndërruar jetë si pasojë e shpërthimit të kokainës që ka gëlltitur, ndërsa familjarët pretendojnë se është dhunuar nga policia. Në dëshminë e fundit të shokut të Lear Kuritit ai thoshte se e kishte parë viktimën të rrihej barbarisht, ndërsa akuzonte drejtorin e AMP, Ardi Veliu se e kishte “këshilluar” indirekt të mos pranonte dhunën që kishte parë me sytë e tij.
