Policia ka arrestuar këtë të Enjte Ergest Beqirajn dhe Indrit Prençin në kuadër të operacioni policor “Beretta”.
Beqiraj, 21vjeç, qarkullonte me armë zjarri teksa ka qenë dhe më parë i dënuar për të njëjtën veprimtari kriminale. Në pranga ka rënë dhe Indrit Prençi, për moskallëzim krimi.
“Shërbimet e Forcës së Posaçme Operacionale të Policisë së Shtetit, në bashkëpunim me Sektorin e Krimeve të Rënda ndaj Jetës dhe Pronës, në Drejtorinë Vendore të Policisë Tiranë, në vijim të punës për goditjen e veprimtarisë kriminale në fushën e armëmbajtjes pa leje, në bazë dhe të informacioneve të siguruara në rrugë operative, organizuan dhe finalizuan operacionin policor të koduar “Beretta”. Si rezultat i këtij operacioni u arrestimi në flagrancë i shtetasit E. B., 21 vjeç, banues në Vlorë, për veprën penale “Mbajtja pa leje dhe prodhimi i armëve, armëve shpërthyese dhe i municionit”. Ky shtetas ka qenë i dënuar më parë për armëmbajtje pa leje”, njofton policia.
Gjatë kontrollit ndaj 21-vjeçarit, në Rrugën e Kavajës, shërbimet e Policisë i kanë gjetur një armë zjarri pistoletë dhe një krehër me fishekë, të cilat u sekuestruan në cilësinë e provës materiale.
“Gjithashtu u arrestua në flagrancë, për veprën penale “Moskallëzimi i krimit”, shtetasi I. P., 31 vjeç, banues në Vorë, i cili shoqëronte shtetasin E. B’, njoftuan të njëjtët burime.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
