Ish-shefi i anti-drogës, Dritan Zagani, komentoi në edicionin e pasdites në Syri Tv rënien e sistemit MEMEX ku u zbërthyen nga hakerat mijëra të dhëna për personat që janë të dyshuar nga policia. Zagani u shpreh se është detyrim ligjor dhe moral që Policia e Shtetit të sqarojë qytetarët se çfarë janë dhe nga ku dolën të dhënat.
“Nëse në këtë listë, janë persona kontigjentë për veprimtari të ndryshme, në aktivitete kriminale, në atë listë mund të ketë njerëz për kontrabanda ordinere, edhe për vrasje, vepra të ndryshme. Për të marrë një person kontigjent, duhen marrë tre informacione nga tre burime të ndryshme për një aktivitet kriminal. Kur janë këto kushte, krijohet fashikulli i kontigjentit që quhet kontigjenti kriminal që duhet të mbikëqyret për aktivitetin për të cilin është regjistruar. Nëse kjo s’është një regjistër i kontigjentëve të MEMEX, që unë dyshoj, por nëse nuk është nga ata, Policia e Shtetit ka detyrë ligjore të sqarojë njerëzit”, tha Zagani.
Më tej ai u shpreh se Policia e Shtetit ka disa sisteme ndërsa për MEMEX tha se është i Policisë Kriminale dhe është mjaft i sofistikuar.
“MEMEX është databaza e Policisë Kriminale, diçka e veçantë dhe e sofistikuar. Lista e MEMEX në fakt ka të shënuara dhe detaje më shumë për personat. Ngjan shumë si lista e patronazhistëve. Por dhe lista e patronazhistë të dali nga sistemet e policisë, është më skandal se të dalë vetë MEMEX. Policia e Shtetit të sqarojë njerëzit. Këta bëhen qesharak. Mos e publikoni kur ajo është publike për këdo”, tha Zagani.
